തിരുവനന്തപുരം: കൽപ്പറ്റയിലെ രാഹുൽ ഗാന്ധി എം പിയുടെ ഓഫീസിലെ ഗാന്ധി ചിത്രം തകർത്തത് കോൺഗ്രസ്സുകാർ തന്നെയാണെന്ന് വ്യക്തമായിരിക്കുന്നതായി ബിജെപി നേതാവ് സന്ദീപ് വാര്യർ. എം പിയുടെ പി എ രതീഷ്, നൗഷാദ്, മുജീബ്, രാഹുൽ രവി എന്നിവരാണ് അറസ്റ്റിലായത്. ഇതിൽ രണ്ടു പേർ രാഹുൽ ഗാന്ധിയുടെ ഓഫീസിലെ ജീവനക്കാരാണ്. സന്ദീപ് വാര്യർ ചൂണ്ടിക്കാട്ടി.
ദേശീയ തലത്തിൽ കോൺഗ്രസ്സ് സഖ്യ കക്ഷിയായ സിപിഎം കേരളം ഭരിക്കുമ്പോൾ രാഹുൽ ഗാന്ധിയുടെ പി എ അന്യായമായി അറസ്റ്റ് ചെയ്യപ്പെടാൻ ഒരു സാധ്യതയുമില്ല. സത്യത്തിൽ സംഭവം അമിതാവേശം കൊണ്ട് സംഭവിച്ചു പോയതാണ്. സുരേഷ് ഗോപിയും സ്‌മൃതി ഇറാനിയും വന്ന് വയനാട്ടിലെ എം പിയുടെ അസാന്നിധ്യം ദേശീയ തലത്തിൽ ചർച്ചയാക്കിയപ്പോൾ രാഹുലിന് സ്വന്തം മണ്ഡലത്തിലേക്ക് മുഖം കാണിക്കാൻ ഒരു കാരണം വേണമായിരുന്നു. അതിനായി ഡൽഹി കേന്ദ്രീകരിച്ച് സിപിഎം കോൺഗ്രസ് നേതൃത്വങ്ങൾ തമ്മിൽ ഉണ്ടാക്കിയ ധാരണയുടെ ഭാഗമായി എസ്എഫ്ഐ നടത്തിയ ക്വട്ടേഷൻ വർക്കാണ് രാഹുൽ ഗാന്ധിയുടെ ഓഫീസ് ആക്രമണ നാടകമെന്ന് സന്ദീപ് വാര്യർ പറഞ്ഞു.
ഡി വൈ എഫ് ഐക്ക് പകരം, വിദ്യാർത്ഥി സംഘടനയായ എസ് എഫ് ഐ ബഫർ സോൺ വിഷയത്തിൽ സമരം ചെയ്തത് നാടകത്തിന്റെ ഭാഗമാണ്. എസ്എഫ്ഐ ആകുമ്പോഴേ രാഹുലിന് “കുട്ടികൾക്ക് മാപ്പ് കൊടുക്കാൻ “പറ്റൂ. നല്ല സ്ക്രിപ്റ്റ് ആയിരുന്നു. പക്ഷേ ക്വട്ടേഷൻ പണി മതിയാക്കി എസ്എഫ്ഐ പിള്ളേർ തിരികെ പോയതിന് ശേഷം അക്രമത്തിന്റെ ദൃശ്യപരത വർദ്ധിപ്പിക്കാൻ രാഹുലിന്റെ പി എയും കോൺഗ്രസ്സ് പ്രവർത്തകരും ചേർന്ന് ചുവരിൽ ഇരുന്ന ഗാന്ധി ചിത്രം തല്ലി പൊളിക്കുകയായിരുവെന്ന് ഫേസ്ബുക്ക് പോസ്റ്റിൽ സന്ദീപ് വാര്യർ പരിഹസിച്ചു.
ഈ തിരക്കഥയുടെ മറുപുറമായിരുന്നു എകെജി സെന്റർ ആക്രമണം. എന്ത് കൊണ്ടാണ് ഈ നിമിഷം വരെ എകെജി സെന്റർ ആക്രമണ കേസിലെ പ്രതിയെ തിരിച്ചറിഞ്ഞിട്ടും അറസ്റ്റ് ചെയ്യാത്തത്? തിരുവനന്തപുരത്തെ കെഎസ്‌യുക്കാരനെ പത്ത് ദിവസം മുമ്പ് തന്നെ ക്രൈം ബ്രാഞ്ച് തിരിച്ചറിഞ്ഞതല്ലേ? ചോദ്യം ചെയ്തതല്ലേ? അതോ നല്ല സമയം നോക്കി ഇരിക്കുകയാണോ ക്രൈം ബ്രാഞ്ച് എസ്പിയെന്നും സന്ദീപ് വാര്യർ പരിഹാസരൂപേണ ചോദിച്ചു.
Comments