കൂട്ടുകാരുടെയോ സഹോദരങ്ങളുടെയോ വസ്ത്രങ്ങൾ നാം മാറി ഇടുന്നത് പതിവാണ്. പൊതു പരിപാടികൾക്കോ വിശേഷ ദിവസങ്ങളിലോ ആകും നാം കൂടുതലായും മറ്റുള്ളവരുടെ വസ്ത്രങ്ങൾ മാറി ധരിക്കുക. ചിലപ്പോൾ ഇത് കഴുകാതെയും നാം ഉപയോഗിക്കും.
വസ്ത്രം മാറിയിടുമ്പോൾ ശരീരത്തിൽ നിന്നും രോഗാണുക്കൾ പടരാനും ത്വക്ക് രോഗങ്ങൾ ഉണ്ടാകാനും സാധ്യതയുണ്ട്. അതുകൊണ്ട് തന്നെ ചർമ്മ പ്രശ്നങ്ങളോ മറ്റോ ഇല്ലാത്തവരുടെ വസ്ത്രമാണോ ധരിക്കുന്നത് എന്ന് നമ്മളിൽ പലരും ശ്രദ്ധിക്കാറുണ്ട്. പ്രത്യേകിച്ചും വൃത്തിയില്ലാത്ത ആളുകളുടെ വസ്ത്രങ്ങൾ നാം ഉപയോഗിക്കാറുമില്ല.
എന്നാൽ ഇനി വസ്ത്രം മാറിയിടുമ്പോൾ ഇത്തരം കാര്യങ്ങൾ മാത്രം ശ്രദ്ധിച്ചാൽ പോര എന്നാണ് പുതിയ പഠനങ്ങൾ വ്യക്തമാക്കുന്നത്. പുകവലിക്കുന്ന ആളുകളുടെ വസ്ത്രം നാം ധരിക്കുമ്പോൾ പ്രത്യേകം ശ്രദ്ധിക്കണമെന്നാണ് ശാസ്ത്രീയ പഠനങ്ങൾ തെളിയിക്കുന്നത്. പുകവലിക്കുന്നവരുടെ വസ്ത്രം മറ്റൊരാൾ മൂന്ന് മണിക്കൂറിലധികം നേരം ധരിക്കുകയാണെങ്കിൽ അയാളിലേക്ക് പുകവലിയുടെ ദോഷങ്ങൾ ഭാഗികമായി എത്തുന്നു. ഇത് അർബുദത്തിന് വരെ കാരണമാകുമെന്നും പഠനങ്ങൾ പറയുന്നു.
കാലിഫോർണിയയിലെ ബെർക്ലീ ലാബ് ആണ് ഇത് സംബന്ധിച്ച് പഠനം നടത്തിയത്. വസ്ത്രം മാത്രമല്ല, പുകവലിക്കാർ ഉപയോഗിക്കുന്ന ടേബിൾ, കസേര, കാർപെറ്റ് എന്നിങ്ങനെയുള്ള സാധനങ്ങളിലൂടെയും വിഷാംശം പകരാൻ സാധ്യതയേറെയാണ്. പുകവലിക്കുന്നവരുടെ സാധനങ്ങൾ ഉപയോഗിച്ചവരിൽ ‘കാർസിനോജൻ’ അഥവാ ക്യാൻസറിന് കാരണമാകുന്ന വിഷാംശം കണ്ടെത്തുന്നുണ്ടെന്നാണ് ഗവേഷകരുടെ പഠനങ്ങൾ വ്യക്തമാക്കുന്നത്.
