ശരീരസംരക്ഷണത്തിൽ ഏറെ ശ്രദ്ധിക്കുന്നവരാണ് സിനിമാതാരങ്ങൾ. ബോളിവുഡിന് പുറമെ മലയാള സിനിമാ മേഖലയിലും ഇതിന് വലിയ പ്രധാന്യം ഉണ്ട്. പഴയ താരങ്ങൾ മുതൽ യുവതാരങ്ങൾ വരെ ഇക്കാര്യത്തിൽ അതീവ ശ്രദ്ധ പുലർത്തുന്നവരാണ്. മോഹൻലാലിനെപ്പോലുളള താരങ്ങളുടെ വ്യായാമ വീഡിയോകൾ എന്നും സമൂഹമാദ്ധ്യമങ്ങൾ അതിശയത്തോടെയാണ് ഏറ്റെടുത്തിട്ടുളളത് . ഇപ്പോഴിതാ അദ്ദേഹത്തിന്റെ ഏറ്റവും പുതിയ വർക്ക്ഔട്ട് വീഡിയോ സമൂഹമാദ്ധ്യമത്തിൽ വലിയ രീതിയിൽ ശ്രദ്ധ നേടുകയാണ്.
സമൂഹമാദ്ധ്യമത്തിലൂടെ പുറത്ത് വന്നിരിക്കുന്നത് ദുബൈയിലെ ജിമ്മിൽ നിന്നുള്ള മോഹൻലാലിന്റെ വർക്ക്ഔട്ട് വീഡിയോയാണ്. മോഹൻലാൽ ഫാൻസ് ക്ലബ്ബിലാണ് വീഡിയോ എത്തിയിരിക്കുന്നത്. വളരെ അനായാസമായി വർക്ക് ഔട്ട് ചെയ്യുന്ന അദ്ദേഹത്തിന് വേണ്ട നിർദ്ദേശങ്ങൾ നൽകി ട്രെയിനറും ഒപ്പം ഉണ്ട്.
പുതിയ ചിത്രമായ ഋഷഭയുടെ ഭാഗമായാണ് മോഹൻലാൽ ദുബൈയിലെത്തിയത്. മലയാളം , ഹിന്ദി, തെലുങ്ക് , തമിഴ് എന്നീ ഭാഷകളിൽ ഒരുക്കുന്ന ചിത്രമാണ് ഇത്. അദ്ദേഹത്തിന്റെതായി അണിയറയിൽ ഒരുങ്ങുന്ന അടുത്ത ചിത്രം ജീത്തു ജോസഫ് സംവിധാനം ചെയ്യുന്ന റാം ആണ്. തൃഷയാണ് ചിത്രത്തിൽ നായികയായി എത്തുന്നത് . അതേസമയം മോഹൻലാൽ ആദ്യമായി സംവിധാനം ചെയ്യുന്ന ‘ബറോസ്’ അടുത്തിടെ ചിത്രീകരണം പൂർത്തിയാക്കിയിരുന്നു.ഇന്ത്യയിലെ ആദ്യ ത്രീഡി ചിത്രമായിരുന്ന ‘മൈ ഡിയർ കുട്ടിച്ചാത്തൻ’ സംവിധാനം ചെയ്ത ജിജോയുടെ കഥയെ ആസ്പദമാക്കിയാണ് മോഹൻലാൽ സിനിമയൊരുക്കുന്നത്.
