തിരുവനന്തപുരം : ചോദ്യങ്ങൾക്ക് വ്യക്തമായ ഉത്തരം നൽകാത്തതിൽ ആരോഗ്യമന്ത്രി വീണാ ജോർജിന് താക്കീത് നൽകി സ്പീക്കർ. നിയമസഭയിൽ ഉന്നയിച്ച ചോദ്യങ്ങൾക്ക് കൃത്യമായ ഉത്തരം നൽകാത്തതിലാണ് വിമർശനം. പിപിഇ കിറ്റ് അഴിമതിയെക്കുറിച്ചുള്ള ചോദ്യങ്ങൾക്ക് ആരോഗ്യമന്ത്രി ഒരേ ഉത്തരം നൽകിയിരുന്നു. പ്രതിപക്ഷത്തിന്റെ പരാതിയിൽ ഇടപെട്ടുകൊണ്ടാണ് സ്പീക്കർ താക്കീത് നൽകിയത്. കുറേ ചോദ്യങ്ങൾക്ക് ഒരേ ഉത്തരം നൽകുന്ന ഈ ശൈലി ആവർത്തിക്കരുത് എന്ന സ്പീക്കറുടെ നിർദ്ദേശം നിയമസഭാ സെക്രട്ടേറിയറ്റ് മന്ത്രിയെ അറിയിച്ചു.
കൊറോണ കാലത്താണ് മെഡിക്കൽ സർവ്വീസ് കോർപ്പറേഷന്റെ പിപിഇ കിറ്റ് പർച്ചേസിൽ വൻ ക്രമക്കേട് ഉണ്ടായത്. ഈ വിഷയത്തിൽ ചോദ്യം ഉന്നയിച്ചപ്പോൾ ആരോഗ്യമന്ത്രിയുടെ ഉത്തരങ്ങൾ എല്ലാം ഒന്നായിരുന്നു എന്ന് പ്രതിപക്ഷം ആരോപിച്ചു.
ആരോഗ്യമന്ത്രി ചോദ്യങ്ങൾക്കുള്ള മറുപടി മനപ്പൂർവ്വം ഒഴിവാക്കുകയാണ്. ഇതിലൂടെ വിവരം ലഭിക്കാനുള്ള അവകാശം മന്ത്രി ഇല്ലാതാക്കുന്നുവെന്ന് കാണിച്ച് എപി അനിൽ കുമാർ സ്പീകർക്ക് പരാതി നൽകിയിരുന്നു. ഇതിലാണ് സ്പീക്കറുടെ കർശന ഇടപെടൽ. ഇത്തരം ശൈലി ഒഴിവാക്കണം എന്നും സ്പീക്കർ അസാധാരണ മുന്നറിയിപ്പ് മന്ത്രിക്ക് നൽകി.
