ഇടുക്കി : അക്ഷയ ഭാഗ്യക്കുറിയിലെ ഐശ്വര്യ ദേവത കനിഞ്ഞത് നിർമാണ തൊഴിലാളിയായ ഏഴല്ലൂർ പ്ലാന്റേഷൻ നടുവിലെ വീട് രാജീവിനെയാണ്. ഇന്നലെ നറുക്കെടുത്ത ഭാഗ്യക്കുറിയുടെ ഒന്നാം സമ്മാനമാണ് രാജീവിന് ലഭിച്ചത്. സ്ഥിരമായി ടിക്കറ്റ് എടുക്കാറുള്ള രാജീവ് 23 ടിക്കറ്റുകളാണ് കഴിഞ്ഞ ദിവസം എടുത്തത്. ഇതിൽ ഒരു ടിക്കറ്റിനാണ് ഒന്നാം സമ്മാനമായ 70 ലക്ഷം അടിച്ചത്.
ഇതിന് പുറമെ മറ്റൊരു ടിക്കറ്റിൽ നിന്ന് സമാശ്വാസ സമ്മാനമായ 8000 രൂപയും ലഭിച്ചു. ദിവസവും പത്ത് ടിക്കറ്റുകൾ വരെ രാജീവ് എടുക്കാറുണ്ട്. വാടകവീട്ടിലാണ് രാജീവനും കുടുംബവും താമസിക്കുന്നത്. ഭാര്യ ശ്രീജ ബേക്കറി ജീവനക്കാരിയാണ്. സ്വന്തമായി വീട് നിർമ്മിക്കണം എന്നാണ് നിലവിൽ രാജീവിന്റെ ആഗ്രഹം
AB 132523 എന്ന നമ്പരിനാണ് ഒന്നാം സമ്മാനം ലഭിച്ചത്. അക്ഷയ ഭാഗ്യക്കുറിയുടെ രണ്ടാം സമ്മാനമായ അഞ്ച് ലക്ഷം രൂപ AL 975557 എന്ന നമ്പരിനാണ് ലഭിച്ചത്. ബുധനാഴ്ച ഉച്ചക്ക് 3 മണിക്കാണ് നറുക്കെടുപ്പ് നടന്നത്. 40 രൂപയാണ് അക്ഷയ ലോട്ടറി ടിക്കറ്റിന്റെ വില. മൂന്നാം സമ്മാനം ഒരു ലക്ഷം രൂപ വീതം 12 പേർക്ക്. ഒന്നാംസമ്മാനം ലഭിച്ച അതേ നമ്പരുള്ള 11 സീരീസിലുള്ളവർക്ക് 8000 രൂപ വീതം സമാശ്വാസ സമ്മാനം ലഭിക്കും. നാലും അഞ്ചും ആറും ഏഴും എട്ടും സമ്മാനം നേടുന്നവർക്ക് യഥാക്രമം 5000, 2000, 1000, 500, 100 രൂപ ലഭിക്കും.
Comments