ചലച്ചിത്ര പ്രവർത്തകരായ അശ്വിനി അയ്യർ തിവാരി, നിതേഷ് തിവാരി എന്നിവരുടെ എർത്ത്സ്കൈ പിക്ച്ചേഴ്സും ഡോ. സംഗീത ജനചന്ദ്രന്റെ സ്റ്റോറീസ് സോഷ്യലും ചേർന്ന് മലയാള ചിത്രം ഒരുക്കുന്നു. ഗർ കി മുർഗി, അൻകഹി കഹാനിയാ , ബ്രേക്ക് പോയിന്റ് തുടങ്ങി ഒരുപിടി നല്ല ചിത്രം നിർമ്മിച്ച എർത്ത്സ്കൈ പിച്ചേഴ്സ് ആദ്യമായാണ് ഒരു മലയാള ചിത്രം നിർമ്മിക്കാനൊരുങ്ങുന്നത്. മാത്രമല്ല, സ്റ്റോറീസ് സോഷ്യലിന്റെ ആദ്യ നിർമ്മാണ സംരംഭവുമായിരിക്കും പുതിയ ചിത്രം. എർത്ത്സ്കൈ പിച്ചേഴ്സ് പ്രൊഡക്ഷൻ കമ്പനിയുടെ ഹെഡും എഴുത്തുകാരിയും സംവിധായികയുമായ അശ്വിനി അയ്യർ തിവാരി തന്നെയാണ് മലയാളത്തിലേക്കുള്ള ആദ്യ ചുവടുവെയ്പ്പിനെപ്പറ്റി അറിയിച്ചത്.
ഇൻസ്റ്റാഗ്രാം പേജിലൂടെയാണ് സിനിമയുടെ പ്രഖ്യാപനം അശ്വിനി അയ്യർ തിവാരി നടത്തിയത്. മലയാളത്തിൽ കഥകൾ പറയുന്നതിനും സിനിമകൾ നിർമ്മിക്കുന്നതിനും സംഗീത ജനചന്ദ്രനുമായി എർത്ത്സ്കൈ പിച്ചേഴ്സ് ഒന്നിക്കുന്നതിൽ സന്തോഷമുണ്ട്. തന്റെ പൂർവ്വികർക്കും മലയാള ചിത്രങ്ങൾ കാണാൻ പ്രേരിപ്പിച്ച തന്റെ അമ്മയ്ക്കുമുള്ള ആദരവാണ് പുതിയ ചിത്രമെന്ന് അശ്വിനി സമൂഹമാദ്ധ്യമങ്ങളിൽ കുറിച്ചു. മലയാളത്തിലെ തങ്ങളുടെ ആദ്യ നിർമ്മാണ സംരംഭം എർത്ത്സ്കൈ പിച്ചേഴ്സിനൊപ്പം ആകുന്നതിൽ സന്തോഷം പങ്കുവെച്ചു കൊണ്ട് സ്റ്റോറീസ് സോഷ്യൽ ഫൗണ്ടർ ഡോ. സംഗീത ജനചന്ദ്രനും രംഗത്തു വന്നു. കഥകൾ പറയാനുള്ള ആഗ്രഹവുമായി സിനിമയുടെ അതിശയകരമായ ലോകത്തേക്കുള്ള അടുത്ത ചുവടുവെയ്പ്പാണിതെന്ന് സംഗീത ജനചന്ദ്രൻ പറഞ്ഞു.
എർത്ത്സ്കൈ പിക്ച്ചേഴ്സും സ്റ്റോറീസ് സോഷ്യലും ചേർന്ന് ഒരു ആക്ഷേപഹാസ്യ ചിത്രമാണ് മലയാളത്തിൽ ഒരുക്കുന്നത്. മിന്നൽ മുരളിയുടെ സഹ-എഴുത്തുകാരൻ ജസ്റ്റിൻ മാത്യുവും നെയ്മർ എന്ന ചിത്രത്തിന്റെ തിരക്കഥാകൃത്ത് പോൾസൺ സ്കറിയയും ചേർന്നാണ് സിനിമയ്ക്ക് തിരക്കഥ ഒരുക്കുന്നത്. മലയാള ചിത്രമായ ഉദാഹരണം സുജാതയ്ക്ക് പ്രചോദനമായ നീൽ ബാട്ടെ സന്നാട്ട എന്ന ഹിന്ദി ചിത്രം സംവിധാനം ചെയ്തതുകൊണ്ടാണ് സിനിമയിൽ അശ്വിനി അയ്യർ തിവാരിയുടെ അരങ്ങേറ്റം. പിന്നീട് ബറേലി കി ബർഫി, പംഗ, അൻകഹി കഹാനിയാ തുടങ്ങിയ ഒരുപിടി വിജയചിത്രങ്ങൾ അവർ സംവിധാനം ചെയ്തിട്ടുണ്ട്.
Comments