രാത്രിയിൽ സുഖമായി കിടന്നുറങ്ങുമ്പോൾ കൊതുകുകൾ വന്ന് കടിച്ച് ശല്യം ചെയ്യുക പതിവാണ്. നല്ലൊരു ഉറക്കം നഷ്ടപ്പെടാൻ അതിന്റെ ഒരു മൂളൽ തന്നെ മതിയാകും. കൊതുകിനെ അകറ്റാൻ പഠിച്ച പണി പതിനെട്ടും നോക്കാറുണ്ടെങ്കിലും മുറിയിൽ ഒരെണ്ണം അവശേഷിക്കുന്നുണ്ടെങ്കിൽ പിന്നെ അന്നത്തെ കാര്യം തീരുമാനമാകും. കൊതുക് ശല്യം വർദ്ധിക്കുന്നതോടെ ഇതെല്ലാം ഇട്ടെറിഞ്ഞ് പോയാലോ എന്ന് വരെ നാം ചിന്തിച്ച് പോകും. അങ്ങനെ ചിന്തിക്കുന്നവർക്ക് പോകാൻ പറ്റിയ ഒരു സ്ഥലത്തെക്കുറിച്ചാണ് പറഞ്ഞുവരുന്നത്. കൊതുകിന്റെ ശല്യം ഇല്ലാത്ത ഒരു നാടിനെക്കുറിച്ച്.
ലോകത്തിലെ കൊതുകുകളില്ലാത്ത വളരെ കുറച്ച് രാജ്യങ്ങളിൽ ഒന്നാണ് നോർത്ത് അറ്റ്ലാന്റിക് രാജ്യമായ ഐസ്ലാന്റ്. ഇവിടെ കൊതുകും പാമ്പും ഇല്ല. അതിന് കാരണം ഐസ്ലാന്റിലെ കാലാവസ്ഥ തന്നെയാണ്. ഐസ്ലാന്റിലെ അതിശൈത്യത്തിൽ കൊതുകുകൾക്ക് നേരിടാനാകില്ല. എല്ലാ വർഷവും ഇവിടുത്തെ തടാകത്തിൽ മൂന്ന് തവണ മഞ്ഞ് മൂടാറുണ്ട്. വെള്ളം തണുത്ത് ഉറയ്ക്കുന്നത് കൊതുകുകൾ പെരുകുന്നത് തടയുന്നു.
ഐസ്ലാൻഡിലെ ജലത്തിന്റെയും മണ്ണിന്റെയും ആവാസവ്യവസ്ഥയുടെ രാസഘടന കൊതുക് ഉണ്ടാകുന്നതിനെ പിന്തുണയ്ക്കുന്നില്ല എന്നതാണ് മറ്റൊരു കണ്ടെത്തൽ. ഐസ്ലാൻഡിന് പുറമെ അന്റാർട്ടിക്കയിലും കൊതുകില്ല. അതിശൈത്യം കാരണം ഇവിടെ മുട്ടയിട്ട് വിരിയിക്കാൻ സാധിക്കാത്തതാണ് കൊതുക് ഇല്ലാത്തതിന്റെ പ്രധാന കാരണം.
