ജയസൂര്യ നായകനാകുന്ന ‘ഈശോ’ സിനിമയുടെ ട്രെയിലർ പുറത്തിറങ്ങി. നാദിർഷ സംവിധാനം ചെയ്യുന്ന ചിത്രം ത്രില്ലർ ഗണത്തിൽപ്പെടുന്നതാണ്. പ്രേക്ഷകരിൽ ഏറെ ആകാംഷ നിറയ്‌ക്കുന്ന തരത്തിലാണ് ചിത്രത്തിന്റെ ട്രെയിലർ ഒരുക്കിയിരിക്കുന്നത്. സുനീഷ് വരനാട് തിരക്കഥ ഒരുക്കിയിരിക്കുന്ന ചിത്രം നിർമ്മിക്കുന്നത്‌ അരുൺ നാരായൺ പ്രൊഡക്ഷൻസിന്റെ ബാനറിൽ അരുൺ നാരായൺ ആണ്. കട്ടപ്പനയിലെ ഹൃതിക്‌റോഷൻ, അമർ അക്ബർ അന്തോണി, കേശു ഈ വീടിന്റെ നാഥൻ എന്നീ ഹാസ്യ ചിത്രങ്ങളിൽ നിന്നും ഏറെ വ്യത്യസ്തമായാണ് നാദിർഷ ഈശോ സംവിധാനം ചെയ്തിരിക്കുന്നത്. വിജയദശമി ദിനമായ ഒക്ടോബർ 5-ന് ചിത്രം സോണി ലൈവിൽ പുറത്തിറങ്ങും.
ജയസൂര്യയ്‌ക്കൊപ്പം ജാഫർ ഇടുക്കി, നമിതാ പ്രമോദ്, സുരേഷ് കൃഷ്ണ, ജോണി ആന്റണി, മണികണ്ഠൻ ആചാരി, രജിത്ത് കുമാർ, ഇന്നസെന്റ് എന്നിങ്ങനെ വലിയ താരനിരയും ചിത്രത്തിൽ അണിനിരക്കുന്നു. നാദിർഷ തന്നെ ചിത്രത്തിന്റെ സംഗീത സംവിധാനം നിർവ്വഹിക്കുമ്പോൾ രാഹുൽ രാജാണ് പശ്ചാത്തല സംഗീതം ഒരുക്കിയിരിക്കുന്നത്. മലയാളത്തിന് പുറമെ തമിഴ്, ഹിന്ദി, തെലുങ്ക്, കന്നട എന്നീ ഭാഷകളിലും ചിത്രം മൊഴിമാറ്റി പ്രദർശിപ്പിക്കുന്നുണ്ട്. വൻ തുകയ്‌ക്കാണ് ഈശോയുടെ സംപ്രേഷണ അവകാശം പ്രമുഖ ഒടിടി പ്ലാറ്റ്‌ഫോം ആയ സോണി ലൈവ് സ്വന്തമാക്കിയിരിക്കുന്നത്.
എക്സിക്യൂട്ടീവ് പ്രൊഡ്യൂസർ എൻ.എം ബാദുഷ, ബിനു സെബാസ്റ്റ്യൻ എന്നിവരാണ്. ഛായാഗ്രഹണം-റോബി വർഗീസ് രാജ്. പ്രൊഡക്ഷൻ കൺട്രോളർ-നന്ദു പൊതുവാൾ, എഡിറ്റർ- ഷമീർ മുഹമ്മദ്, പശ്ചാത്തല സംഗീതം-ജേക്സ് ബിജോയ്, കല-സുജിത് രാഘവ്, മേക്കപ്പ്-പി.വി ശങ്കർ, വസ്ത്രാലങ്കാരം-അരുൺ മനോഹർ, സ്റ്റിൽസ്-സിനറ്റ് സേവ്യർ, ആക്ഷൻ- ജോളി ബാസ്റ്റിൻ, കൊറിയോഗ്രാഫി- ബ്രിന്ദ മാസ്റ്റർ, ചീഫ് അസോസിയേറ്റ് ഡയറക്ടർ-സെെലക്സ് ഏബ്രാഹം, അസോസിയേറ്റ് ഡയറക്ടർ- വിജീഷ് പിള്ള & കോട്ടയം നസീർ എന്നിവരാണ് മറ്റ് അണിയറ പ്രവർത്തകർ.
Comments