അവതാരകന്റെ വിഡ്ഢി ചോദ്യത്തിന് കലക്കൻ മറുപടിയുമായി സംവിധാകൻ ഗൗതം മേനോൻ. അദ്ദേഹത്തിന്റെ പുതിയ ചിത്രമായ വെന്തു തണിന്തത് കാട് എന്ന സിനിമയുടെ പ്രമോഷനുമായി ബന്ധപ്പെട്ട് നടത്തിയ അഭിമുഖത്തിനിടെയാണ് സംഭവം. ‘ ചെക്ക ചിവന്ത വാനം സിനിമ ഷൂട്ട് വളരെ ബുദ്ധിമുട്ടേറിയതായിരിക്കുമല്ലോ? ചിമ്പു, വിജയ് സേതുപതി, അരവിന്ദ് സാമി, ഇവരെയൊക്കെ എങ്ങനെ മാനേജ് ചെയ്തു’ എന്നായിരുന്നു അവതാരകന്റെ ചോദ്യം. എന്നാൽ 2018ൽ പുറത്തിറങ്ങിയ ചെക്ക ചിവന്ത വാനം സംവിധാനം ചെയ്തത് മണിരത്നമാണ്. ഇത് പോലും അറിയാതെയാണ് ഗൗതം മേനോനോട് അവതാരകൻ ഈ ചോദ്യം ചോദിക്കുന്നത്.
എന്നാൽ ചോദ്യത്തോട് വളരെ തന്മയത്വത്തോടെയാണ് ഗൗതം മേനോൻ മറുപടി നൽകുന്നത്. താൻ തന്നെയാണ് ആ ചിത്രം സംവിധാനം ചെയ്തത് എന്ന രീതിയിലാണ് ഗൗതം മേനോൻ മറുപടി നൽകുന്നത്. ‘ ശരിയാണ്. വളരെ ബുദ്ധിമുട്ടേറിയ ഷൂട്ടായിരുന്നു അത്. വിജയ് സേതുപതി, ചിമ്പു, അരുൺ വിജയ്, അരവിന്ദ് സാമി എല്ലാവരും വലിയ തിരക്കേറിയ താരങ്ങളാണ്. ഇവരുടെയെല്ലാം ഡേറ്റ് വേണം. പക്ഷേ ഞാൻ മണിരത്നം ആയതു കൊണ്ട് തന്നെ എനിക്ക് വളരെ എളുപ്പത്തിൽ ഇവരെയൊക്കെ സിനിമയിലേക്ക് കൊണ്ടുവരാൻ സാധിച്ചു. രാവിലെ 4.30നാണ് ഷൂട്ടിംഗ് തുടങ്ങുന്നത്. എല്ലാവരും കൃത്യസമയത്ത് തന്നെ സെറ്റിലെത്തും. പക്ഷേ ഗൗതം മേനോന്റെ സെറ്റിൽ ചിമ്പു 7 മണിക്കേ എത്തൂ എന്ന് നിങ്ങൾ കേട്ടിട്ടുണ്ടാകും. പക്ഷേ ഇവിടെ എല്ലാവരും എനിക്ക് വേണ്ടി കൃത്യസമയത്ത് എത്തിയെന്നും’ ഗൗതം മേനോൻ പറയുന്നു.
He really handled it well. What was the anchor thinking here pic.twitter.com/OKtXjB1YHF
— Madras Film Screening Club 🎬 (@MadrasFSC) September 20, 2022
അതേസമയം അഭിമുഖത്തിലെ ഈ ഭാഗം സമൂഹമാദ്ധ്യമങ്ങളിലെല്ലാം വ്യാപകമായി പ്രചരിക്കുന്നുണ്ട്. അവതാരകനെതിരെ വലിയ വിമർശനവും ഉയരുന്നുണ്ട്. ഗൗതം മേനോനെ പോലൊരു സംവിധായകനെ ഇന്റർവ്യു ചെയ്യാനിരിക്കുമ്പോൾ യാതൊരു വിധ തയ്യാറെടുപ്പുകളും ഇല്ലാതെ വിഡ്ഢി ചോദ്യം ചോദിക്കുന്നതിനാണ് വിമർശനം. എന്നാൽ ആ സന്ദർഭത്തെ വളരെ രസകരമായി കൈകാര്യം ചെയ്ത ഗൗതം മേനോനെ അഭിനന്ദിച്ചും നിരവധി പേർ രംഗത്തെത്തിയിട്ടുണ്ട്.
