ചിരഞ്ജീവി ആരാധകർ ഏറെ കാത്തിരിക്കുന്ന ചിത്രമാണ് ഗോഡ്ഫാദര്. മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്ത ലൂസിഫറിന്റെ തെലുങ്ക് റീമേക്കാണ് ചിരഞ്ജീവി നായകനാകുന്ന ഗോഡ്ഫാദര്. അതുകൊണ്ട് തന്നെ ലൂസിഫർ ആരാധകരും ഏറെ കാത്തിരിക്കുന്ന ചിത്രമാണ് ഗോഡ്ഫാദര്. ഇപ്പോൾ ചിത്രത്തിന്റെ ട്രെയിലർ പുറത്തു വിട്ടിരിക്കുകയാണ് അണിയറ പ്രവർത്തകർ. ലൂസിഫറിലെ പല രംഗങ്ങളും അതേപടിതന്നെ ഗോഡ്ഫാദറിലും ചിത്രീകരിച്ചിരിക്കുന്നതായാണ് ട്രെയിലറിൽ നിന്നും വ്യക്തമാകുന്നത്. ഇതോടെ സമൂഹമാദ്ധ്യമങ്ങളിൽ ഇരു സിനിമകളിലെയും രംഗങ്ങൾ തമ്മിൽ താരതമ്യപ്പെടുത്താനും ആരംഭിച്ചു. ലൂസിഫറിൽ നിന്നും വ്യത്യസ്തമായി പല രംഗങ്ങളും തെലുങ്ക് ആരാധകരുടെ കയ്യടി നേടാൻ വലിയ മാസ് രംഗങ്ങളായി ചിത്രീകരിച്ചിരിച്ചുണ്ട്. സൽമാൻ ഖാന്റെ രംഗങ്ങളും തിയറ്ററുകളിൽ കൈയ്യടി നേടുമെന്ന് ഉറപ്പാണ്.
മലയാളത്തില് പൃഥ്വിരാജ് അവതരിപ്പിച്ച കഥാപാത്രത്തെയാണ് സല്മാന് തെലുങ്കില് അവതരിപ്പിക്കുന്നത്. മഞ്ജു വാര്യര് അവതരിപ്പിച്ച കഥാപാത്രമായി എത്തുന്നത് നയന്താരയാണ്. ചിരഞ്ജീവിയുടെ കരിയറിലെ 153-ാം ചിത്രവുമാണിത്. മോഹന് രാജയാണ് ഗോഡ്ഫാദർ സംവിധാനം ചെയ്തിരിക്കുന്നത്. ചിരഞ്ജീവിയുടെ പിറന്നാളിന് ചിത്രത്തിന്റെ ടീസറും അണിയറ പ്രവർത്തകർ പുറത്തിറക്കിയിരുന്നു. ഇതോടെ ട്രെയിലറിന് വേണ്ടി ആരാധകരുംസിനിമാ പ്രമികളും വലിയ കാത്തിരിപ്പിലായിരുന്നു.
കോനിഡേല പ്രൊഡക്ഷന് കമ്പനിയും സൂപ്പര് ഗുഡ് ഫിലിംസും ചേര്ന്നാണ് ചിത്രത്തിന്റെ നിര്മ്മാണം. സത്യദേവ് കഞ്ചാറാണയും ഒരു പ്രധാന കഥാപാത്രത്തെ അവതരിപ്പിച്ചിരിക്കുന്നു. വിജയ് നായകനായ മാസ്റ്റര് ഉള്പ്പെടെ സിനിമകൾക്ക് ക്യാമറ ചലിപ്പിച്ച നീരവ് ഷായാണ് ചിത്രത്തിന്റെ ഛായാഗ്രാഹകന്. നിരവധി ബോളിവുഡ് ചിത്രങ്ങളുടെ കലാസംവിധാനം നിര്വ്വഹിച്ച സുരേഷ് സെല്വരാജനാണ് കലാസംവിധായകന്. എസ്.തമൻ സംഗീത സംവിധാനവും പ്രഭുദേവ നൃത്തസംവിധാനവും നിര്വ്വഹിച്ചിരിക്കുന്നു.
