വേലയിറക്കിയാൽ മണിച്ചിത്രത്താഴിട്ട് പൂട്ടും; കേരളത്തിലെ വിവിധ തരം പൂട്ടുകൾ

നമ്മുടെ വീടും കടകളും സുരക്ഷിതമാക്കാൻ ഉപയോഗിക്കുന്നവയാണ് പൂട്ടുകൾ.അഥവാ താഴുകൾ. ഇന്ന് സെൻസറിംഗ് വിദ്യയും പുത്തൻ സാങ്കേതിക വിദ്യകളും ഉപയോഗിച്ച് വീടുകളും മറ്റും സുരക്ഷിതമാക്കുന്നുണ്ടെങ്കിലും പൂട്ടിനോട് ഇഷ്ടക്കൂടുതലുണ്ട് നമുക്ക്. മണിച്ചിത്രത്താഴുകൾ മുതൽ കോൽത്താഴുകൾ വരെ നമ്മുടെ ഈ കൊച്ചു കേരളത്തിൽ പ്രചാരത്തിലുണ്ടായിരുന്നു.വ്യത്യസ്തമായ ചില പൂട്ടുകളെ പരിചയപ്പെടാം

മരത്താഴുകൾ

സാധാരണയായി വീടുകളിലുണ്ടായിരുന്ന തരം പൂട്ടുകളാണിവ.വാതിലിൽ മരം കൊണ്ടുണ്ടാക്കിയ വളരെ ലളിതമായ ഡിസൈനുകളോട് കൂടിയ പൂട്ടാണിത്. ഇതിന്റെ താക്കോൽ ദ്വാരം വാതിലിൽ തന്നെയായിരിക്കും. വീടുകളിലെ മുറികൾ പൂട്ടാനും കടകൾ പൂട്ടാനും ഇത് ഉപയോഗിക്കുന്നു

മര ഓടാമ്പലുകൾ

വാതിലുകൾ പൂട്ടിയടക്കുന്നതിനായുള്ള മരം കൊണ്ടുള്ള ലളിതമായ താഴ് സംവിധാനം. രണ്ട് പൊളി കതുകുകളുള്ള കെട്ടിടങ്ങളിലാണ് ഇത് സാധാരണയായി ഉപയോഗിക്കാറുള്ളത്. രണ്ട് കതകു പാളികളെയും പരസ്പരം ബന്ധിപ്പിക്കുന്ന മരം കൊണ്ടുള്ള ഒരു സംവിധാനമാണിത്.

ലോഹ പൂട്ടും താക്കോലും

കടകളും മറ്റും പൂട്ടാൻ സാധാരണയായി ഉപയോഗിക്കുന്നവയാണ് പൂട്ടും താക്കോലും. പ്രത്യേക ആകൃതികളിലുണ്ടാക്കുന്ന പൂട്ടും അതിന് ചേർന്ന താക്കോലുമാണ് ഇതിന്റെ പ്രത്യേകത.മരം കൊണ്ടോ മറ്റ് ലോഹങ്ങൾ കൊണ്ടോ ഉണ്ടാക്കിയ ഓടാമ്പലിലാണ് പൂട്ടും താക്കോലും ഉപയോഗിക്കുന്നത്.

കോൽത്താഴുകൾ

ക്ഷേത്രങ്ങളിലെ ശ്രീകോവിലും വീടുകളിലെ പൂജാമുറികളുമൊക്കെ പൂട്ടാൻ ഉപയോഗിക്കുന്ന പൂട്ടുകളാണ് കോൽത്താഴുകൾ.സാധാരണ ഓടിലാണ് ഇത് നിർമ്മിക്കുന്നത്. രൂപത്തിൽ വാദ്യോപകരണമായ തിമിലയുടെ ആകൃതിയാണ് കോൽത്താഴിനുള്ളത്.പ്രധാനമായും രണ്ടുഭാഗമാണ് താഴിനുള്ളത്. കോൽ എന്ന് വിളിക്കുന്ന താക്കോൽ ഇട്ട് തള്ളി തുറക്കുമ്പോൾ ത്രികോണാകൃതിയിൽ പുറത്തേക്ക് തുറന്നുവരുന്ന ഒരു ഭാഗവും, അടുത്തത് തിമിലാകൃതിയുള്ള രണ്ടാമത്തെ ഭാഗവുമാണ്.

കോൽത്താഴിട്ടു പൂട്ടുന്ന അവസരത്തിൽ ത്രികോണാകൃതിയിലുള്ള താഴിന്റെ ഈ ഭാഗം വലിപ്പം കുറഞ്ഞ് ഉള്ളിൽകടക്കുകയും അതിനുശേഷം വികസിക്കുകയും താഴ് പൂട്ടുകയും ചെയ്യുന്നു. തുറക്കാൻ ഉപയോഗിക്കുന്ന കോൽ താഴിനുള്ളിൽ ഇടുമ്പോൾ ഈ ത്രികോണാകൃതിയിലുള്ള താഴിന്റെ ഭാഗം വലിപ്പം കുറയുകയും, കോൽതാക്കോലിട്ട് ബലമായി അകത്തേക്ക് തള്ളുമ്പോൾ താഴ് പുറത്തേക്ക് തുറന്നുവരികയും ചെയ്യുന്നു. എല്ലാ കോൽ താക്കോലുകളും കണ്ടാൽ ഒരുപോലെ ഇരിക്കുമെങ്കിലും, ഒരു താക്കോൽ ഒരു താഴിനുമാത്രമേ ഉപയോഗിക്കാൻ പറ്റുകയുള്ളു.

മണിച്ചിത്രത്താഴ്

പഴയ തറവാടു വീടുകളുടെ പ്രധാനപ്പെട്ട വാതിലുകൾ പൂട്ടുവാനായി ഉപയോഗിച്ചിരുന്ന ചിത്രങ്ങളും കൊത്തുപണിയും ഉള്ള മനോഹരമായതും സങ്കീർണ്ണമായതുമായ താഴ്. കേരളത്തിലെ വലിയ തറവാടുകളിലെ നിലവറകളിലെ മുറികളും മറ്റും പൂട്ടിയിടുവാനായി ഇത്തരം താഴുകൾ ഉപയോഗിച്ചിരുന്നു