ച്യൂയിംഗ് ഗം ചവച്ചും ഉറങ്ങിയും യന്തിരനെ പോലെ വേഗത്തിൽ പഠിക്കാം; ബുദ്ധിരാക്ഷസനാവാൻ ഈ മാർഗങ്ങളൊന്ന് പരീക്ഷിച്ചാലോ?

പുതിയ കാര്യങ്ങളെ പറ്റി അറിയാനും അതിനെ പറ്റി പഠിക്കാനും ഇഷ്ടമുള്ളവരാണ് നമ്മൾ.പഠനകാലത്ത് ഏറ്റവും വിഷമിപ്പിക്കുന്ന കാര്യം വേഗത്തിൽ കാര്യങ്ങൾ പഠിച്ചെടുക്കാൻ കഴിയാത്ത അവസ്ഥയാണ്. ഇഷ്ടമുണ്ടായിട്ടും വേഗത്തിൽ പഠിക്കാൻ കഴിയാത്തിനാൽ പ്രയാസമനുഭവിക്കുന്നവർക്ക് എളുപ്പത്തിൽ ശ്രദ്ധ കേന്ദ്രീകരിക്കാനുള്ള മാർഗങ്ങൾ നോക്കാം

സ്ലീപ്പ് സാൻഡ് വിച്ച്

പെട്ടെന്ന് തന്നെ എന്തെങ്കിലും പഠിച്ചെടുക്കാനുണ്ട്. മുന്നിലുള്ളത് കുറച്ച് സമയം മാത്രം ഇങ്ങനെയുള്ള അവസരങ്ങളിൽ ഉപയോഗിക്കുന്ന ഒരു രീതിയാണ് സ്ലീപ്പ് സാൻഡ് വിച്ച്. ശാസ്ത്രജ്ഞരടക്കം ശുപാർശ ചെയ്യുന്ന ഈ രീതി, പഠനം, കുറച്ച് സമയത്തെ ഉറക്കം, പിന്നെയും പഠനം എന്നിങ്ങനെയാണ് പിന്തുടരുന്നത്. സ്ലീപ്പ് സാൻഡ്വിച്ച് വേഗത്തിൽ പഠിക്കാനുള്ള മികച്ച മാർഗമാണ്. ഉറങ്ങാതിരിക്കുന്നത് മസ്തിഷകത്തിന്റെ പ്രവർത്തനത്തെ മന്ദഗതിയിലാക്കുന്നു. അത് കൊണ്ട് അവസാന നിമിഷം പഠിച്ചെടുക്കണമെങ്കിൽ ഈ രീതി പിന്തുടരുന്നത് ഉചിതമായിരിക്കും.

കണക്ട് ചെയ്ത് പഠിക്കുക

മുത്തുമാല പോലെ ഒരോ കാര്യങ്ങളും ബന്ധിപ്പിച്ച് പഠിക്കുക. വ്യത്യസ്ത വിഷയങ്ങളും കാര്യങ്ങളും ഇഴചേർത്ത് പഠിക്കുന്നത് ഓർമ്മയിൽ കാര്യങ്ങൾ എളുപ്പത്തിൽ സൂക്ഷിക്കാനും ഉറപ്പിക്കാനും സഹായിക്കും.

ച്യൂയിംഗ് ഗം ചവയ്‌ക്കുന്നത്

കേൾക്കുമ്പോൾ മണ്ടത്തരമെന്ന് തോന്നുമെങ്കിലും തലച്ചോറിൽ വേഗത്തിൽ കാര്യങ്ങൾ ഉറപ്പിക്കാൻ ച്യൂയിംഗ് ഗം സഹായിക്കും.ച്യൂയിംഗ് ഗം ചവയ്‌ക്കുന്ന ആളുകൾ കൂടുതൽ ജാഗ്രത പുലർത്തുകയും അവരുടെ സമ്മർദ്ദം കുറയുകയും ചെയ്യും. 2011ലെ ഒരു പഠനത്തിലൂടെയാണ് ഇത് ആദ്യമായി കണ്ടെത്തിയത്.

ലഘു കുറിപ്പുകൾ തയ്യാറാക്കുക

ഒരുപാട് വലുതാണ് പഠിക്കാനുള്ളതെങ്കിൽ പ്രധാനപ്പെട്ട കാര്യങ്ങൾ ചെറിയ കുറിപ്പുകളാക്കി എഴുതുക. എഴുതുന്നത് കാര്യങ്ങളെ വേഗത്തിൽ തലച്ചോറിലെത്തിക്കുമെന്നാണ് പഠനങ്ങൾ സൂചിപ്പിക്കുന്നത്.

കോഡുകൾ ഉപയോഗിച്ച് പഠിക്കുക

പിഎസ്.സി പരീക്ഷകൾക്കായും മറ്റും ഉദ്യോഗാർഥികൾ ഉപയോഗിച്ച് വരുന്ന പഠന രീതിയാണ്. ഒരേ വിഷയവുമായി ബന്ധപ്പെട്ട കാര്യങ്ങളെ സിനിമാ പേരുകളായോ എന്തെങ്കിലും വാക്യങ്ങളായോ ചേർത്ത് പഠിക്കുന്നത്.

ഈ രീതികളിലുപരി ഏകാഗ്രതയോടെ ആത്മവിശ്വാസത്തോടെ ഒരു കാര്യം മനസിലാക്കണമെന്ന് വിചാരിച്ച് സമീപിച്ചാൽ കാര്യങ്ങൾ എളുപ്പത്തിൽ പഠിച്ചെടുക്കാം.