ചർമ്മത്തിന് ചൊറിച്ചിൽ അനുഭവപ്പെടുക എന്നത് ഒരു സാധാരണ അവസ്ഥയാണ്. അതുകൊണ്ട് തന്നെ ചൊറിച്ചിൽ നാം അത്ര ഗൗരവമായി കാണാറില്ല. ചിലപ്പോൾ അലർജി മൂലമോ മറ്റ് അണുബാധ മൂലോയെല്ലാം ഈ അവസ്ഥ ഉണ്ടാകാറുണ്ട്. അപ്പോൾ നാം ഡോക്ടറെ കണ്ട് അതിന് പരിഹാരവും തേടാറുണ്ട്. ഭൂരിഭാഗം പേരും ചൊറിച്ചിലിനെ ചർമ്മത്തിന്റെ പ്രശ്നമായി മാത്രമാണ് കാണാറുള്ളത്. എന്നാൽ ശരീരത്തിലുണ്ടാകുന്ന ചൊറിച്ചിൽ പല ഗുരുതര രോഗങ്ങളുടെയും ലക്ഷണമാണെന്നാണ് വിദഗ്ധർ പറയുന്നത്.
നാഡി, വൃക്കകൾ എന്നിവയ്ക്കുണ്ടാകുന്ന തകരാറുകൾ, തൈറോയ്ഡ്, കരൾ രോഗം എന്നിവയുള്ളവർക്ക് ശരീരത്തിൽ ചൊറിച്ചിൽ ഉണ്ടാകും. ചുണങ്ങില്ലാതെയുള്ള ചൊറിച്ചിലാണ് ഈ രോഗങ്ങളുടെ ലക്ഷണം. ശരീരത്തിൽ മുഴുവനാനോ, അല്ലെങ്കിൽ പ്രത്യേക ഭാഗത്തോ ആകും ചൊറിച്ചിൽ അനുഭവപ്പെടുക. ചിലപ്പോൾ മിതമായോ, കഠിനമായോ ചൊറിച്ചിൽ അനുഭവപ്പെടാം. അതിനാൽ വിട്ടുമാറാത്ത ചൊറിച്ചിൽ ഉണ്ടെങ്കിൽ ഉടനെ വൈദ്യസഹായം തേടേണ്ടത് അത്യാവശ്യമാണ്.
ചർമ്മത്തിലുണ്ടാകുന്ന ക്യാൻസറിന്റെ ലക്ഷണമാണ് വിട്ടുമാറാത്ത ചൊറിച്ചിൽ എന്നത്. ക്യാൻസർ ഉള്ളവരിൽ ആദ്യം ശരീരത്തിൽ പാടുകൾ രൂപപ്പെടുകയും പിന്നീട് ആ ഭാഗത്ത് ചൊറിച്ചിൽ അനുഭവപ്പെടുകയും ചെയ്യും. അതിനാൽ ഇത്തരം അവസ്ഥയുണ്ടായാൽ നിർബന്ധമായും ഡെർമറ്റോളജിസ്റ്റിനെ കണ്ട് കാരണം കണ്ടെത്തുക.
പ്രമേഹമുള്ളവരിലും ചൊറിച്ചിൽ അനുഭവപ്പെടും. ദേഹമാസകലം ചൊറിഞ്ഞ് തടിക്കുന്ന അവസ്ഥയാണ് പ്രമേഹമുള്ളവരിൽ കാണപ്പെടുക. അതിനാൽ പ്രമേഹം ഉള്ളവർ ശരീരത്തിൽ ചൊറിച്ചിൽ അനുഭവപ്പെട്ടാൽ ഉടൻ ഡോക്ടറെ സമീപിക്കണം.
ഹെപ്പറ്റൈറ്റിസ് സി, സിറോസിസ്, അല്ലെങ്കിൽ പിത്തരസം തടസ്സപ്പെടുന്നവരിലും ചൊറിച്ചിൽ സാധാരണമാണ്. ചിലപ്പോൾ മരുന്നുകളുടെ പാർശ്വഫലം കൊണ്ടും ശരീരത്തിൽ ചൊറിച്ചിൽ അനുഭവപ്പെടാം.
Comments