പറ്റ്ന: രാമായണത്തിലെ വിശ്വാമിത്ര മഹർഷിയായി കേന്ദ്രമന്ത്രി അശ്വിനി കുമാർ ചൗബേ. നവരാത്രി ആഘോഷങ്ങളുടെ ഭാഗമായി അവതരിപ്പിച്ച രാമ ലീലയിലാണ് അദ്ദേഹം വിശ്വാമിത്ര മഹർഷിയായി വേഷമിട്ടത്. വിശ്വമിത്ര മഹർഷിയായി അരങ്ങു തകർക്കുന്ന അശ്വിനി കുമാർ ചൗബേയുടെ വീഡിയോകളും ചിത്രങ്ങളും സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
കഴിഞ്ഞ ദിവസമായിരുന്നു ലവ-കുശ രാമ ലീല കമ്മിറ്റി നാടകം സംഘടിപ്പിച്ചത്. സീതാ സ്വയം വരത്തിന് അനുഗ്രഹം നൽകാൻ ജനക മഹാരാജാവിന്റെ ക്ഷണ പ്രകാരം ജനക്പൂരിലേക്ക് പോയ വിശ്വാമിത്ര മഹർഷി രാമ-ലക്ഷ്ണന്മാരെയും കൂടെക്കൂട്ടിയിരുന്നു. ഈ രംഗമായിരുന്നു അശ്വിനി ചൗബേ നാടകത്തിൽ അവതരിപ്പിച്ചത്. അദ്ദേഹത്തിന്റെ അഭിനയം കണ്ടുനിന്നവരിലും അമ്പരപ്പുണ്ടാക്കി. പരിപാടിക്ക് ശേഷം അദ്ദേഹത്തെ നേരിൽ കണ്ട് അഭിനന്ദിക്കാനും കാണികൾ മറന്നില്ല.
വിശ്വാമിത്ര മഹർഷിയായി അഭിനയിക്കാൻ സാധിച്ചതിൽ അതിയായ സന്തോഷമുണ്ടെന്ന് അശ്വിനി കുമാർ ചൗബേ പ്രതികരിച്ചു. വളരെ മികച്ച അനുഭവമായിരുന്നു അത്. എല്ലാവരിൽ നിന്നു മികച്ച പ്രതികരണമാണ് ലഭിച്ചത് എന്നും അദ്ദേഹം പറഞ്ഞു. അശ്വിനി കുമാർ ചൗബേയ്ക്ക് സമാനമായ രീതിയിൽ ബിജെപി നേതാവ് മനോജ് തിവാരിയും രാമലീലയിൽ അഭിനയിച്ചിരുന്നു.
