ഇൻഡോർ: റിലീ റൂസോയുടെ സെഞ്ച്വറിക്കരുത്തിൽ ഇന്ത്യക്കെതിരെ കൂറ്റൻ സ്കോർ നേടി ദക്ഷിണാഫ്രിക്ക. ടോസ് നഷ്ടമായി ബാറ്റിംഗിനയക്കപ്പെട്ട സന്ദർശകർ 20 ഓവറിൽ 3 വിക്കറ്റ് നഷ്ടത്തിൽ 227 റൺസ് അടിച്ചു കൂട്ടി. റൂസോ 48 പന്തിൽ 8 സിക്സുകളുടെയും 7 ഫോറുകളുടെയും അകമ്പടിയോടെ 100 റൺസുമായി പുറത്താകാതെ നിന്നു. മികച്ച ഫോമിൽ കളിക്കുന്ന ഓപ്പണർ ഡി കോക്ക് 68 റൺസ് നേടി. ഇന്ത്യക്ക് വേണ്ടി ദീപക് ചഹാറും ഉമേഷ് യാദവും ഓരോ വിക്കറ്റ് വീതം വീഴ്ത്തി.
കൂറ്റൻ വിജയലക്ഷ്യം പിന്തുടർന്ന് ഇറങ്ങിയ ഇന്ത്യക്ക് തുടക്കത്തിൽ തന്നെ 2 വിക്കറ്റുകൾ നഷ്ടമായി. ക്യാപ്ടൻ രോഹിത് ശർമ്മ റൺ ഒന്നും എടുക്കാതെ റബാഡക്ക് വിക്കറ്റ് സമ്മാനിച്ച് മടങ്ങിയപ്പോൾ ഒരു റൺ എടുത്ത ശ്രേയസ് അയ്യരെ പാർണൽ മടക്കി. നിലവിൽ 4.3 ഓവർ പിന്നിടുമ്പോൾ ഇന്ത്യ 2 വിക്കറ്റ് നഷ്ടത്തിൽ 35 റൺസ് എന്ന നിലയിലാണ്. ഋഷഭ് പന്തും ദിനേശ് കാർത്തികുമാണ് ക്രീസിൽ.
ആദ്യ രണ്ട് മത്സരങ്ങളിലും വിജയിച്ച ഇന്ത്യ പരമ്പര സ്വന്തമാക്കിക്കഴിഞ്ഞു. ഇന്നത്തെ മത്സരഫലം അപ്രസക്തമാണ്.
