തിരുപ്പതി: ആന്ധ്രപ്രദേശിലെ തിരുപ്പതി ജില്ലയിൽ ശ്രീ സിറ്റിയിലെ സ്വകാര്യ ഫാർമസ്യൂട്ടിക്കൽ കമ്പനിയിൽ ബോയിലർ പൊട്ടിത്തെറിച്ച് അഞ്ച് പേർ മരിച്ചു. 10 പേർക്ക് പരിക്കേറ്റു. സത്യവേഡു മണ്ഡലത്തിലെ വ്യവസായ മേഖലയിലാണ് അപകടമുണ്ടായത്.
രാത്രി ഷിഫ്റ്റിൽ തൊഴിലാളികൾ ജോലി ചെയ്യുന്നതിനിടെയാണ് അപ്രതീക്ഷിതമായി ബോയിലർ പൊട്ടിത്തെറിച്ചത്. അപകടത്തിന്റെ കൃത്യമായ കാരണം വ്യക്തമല്ല. സംഭവസമയത്ത് കമ്പനിക്കുള്ളിൽ എത്ര തൊഴിലാളികൾ ഉണ്ടായിരുന്നുവെന്നതിലും വ്യക്തത വന്നിട്ടില്ലെന്ന് പൊലീസ് അറിയിച്ചു.
പരിക്കേറ്റവരെ ആശുപത്രിയിൽ പ്രവേശിപ്പിച്ചിരിക്കുകയാണ്. അപകടത്തെ തുടർന്ന് പ്രദേശത്ത് സുരക്ഷാ പരിശോധനകളും ആരംഭിച്ചു. ബോയിലർ പൊട്ടിത്തെറിച്ചതിന്റെ കാരണം കണ്ടെത്താനുള്ള അന്വേഷണം പുരോഗമിക്കുകയാണ്.
