അടുത്തകാലത്ത് ഇറങ്ങിയതിൽ നിരവധി വിമർശനങ്ങൾ ഏറ്റുവാങ്ങിയ ഒന്നായിരുന്നു ആദിപുരുഷിന്റെ ടീസർ. 500 കോടി ബജറ്റിൽ രാമായണം പശ്ചാത്തലമാക്കി വരുന്ന ചിത്രത്തിൽ നായകനായി എത്തുന്നത് പ്രഭാസാണ്. ചത്രത്തിന്റെ ടീസർ പുറത്ത് വന്നതിന് പിന്നാലെയാണ് സിനിമയ്ക്കെതിരെയും സംവിധായകനെതിരെയും വിമർശനവുമായി നിരവധി പേർ രംഗത്തെത്തിയത്. ഇത്ര അധികം പണം ചിലവാക്കി നിർമ്മിക്കുന്ന ഒരു ചിത്രത്തിൽ നിന്ന് കാർട്ടൂണിന് സമാനമായ പ്രകടനം അല്ല പ്രതീക്ഷിക്കുന്നത് എന്ന തരത്തിലായിരുന്നു ആളുകളുടെ പ്രതികരണം.
എന്നാൽ വിമർശനങ്ങളെ എല്ലാം മാറ്റി നിർത്തി പ്രശംസ ഏറ്റുവാങ്ങുകയാണ് ചിത്രത്തിന്റെ 3ഡി ടീസർ .ഹൈദരാബാദിലാണ് ചിത്രത്തിന്റെ 3ഡി ടീസർ ലോഞ്ച് ചെയ്തത്. ലോഞ്ചിന് പിന്നാലെ സംവിധായകനെ തേടി എത്തിയത് മികച്ച പ്രതികരണങ്ങളാണ് . നായകനായ പ്രഭാസാണ് ആദ്യ പ്രതികരണവുമായി എത്തിയത്.തന്റെ ചിത്രം 3 ഡി ആയി കണ്ടത് ത്രില്ലടിപ്പിച്ചു എന്നാണ് താരത്തിന്റെ പ്രതികരണം. വലിയ സ്ക്രീനിൽ ആദ്യമായാണ് 3 ഡിയിൽ താൻ തന്നെ കാണുന്നത്.അതിനാൽ ഞാൻ എന്നെ തന്നെ നോക്കി നിൽക്കുകയായിരുന്നു.മൃഗങ്ങളുടെ രംഗങ്ങൾ വളരെ ആകാംഷ നിറച്ചിരുന്നുവെന്നും അദ്ദേഹം പ്രതികരിച്ചു.
അതേസമയം ചിത്രത്തിന്റെ ടീസറിന് വിമർശനങ്ങൾ ഉയർന്നതിന് പിന്നാലെ പ്രതികരണവുമായി സംവിധായകൻ രംഗത്തെത്തിയിരുന്നു. 3ഡിയിൽ തയ്യാറാക്കപ്പെടുന്ന ചിത്രം ബിഗ് സ്ക്രീനിനെ ഉദ്ദേശിച്ചുള്ളതാണെന്നും മൊബൈൽ സ്ക്രീനിൽ കണ്ടാൽ അത് ആസ്വദിക്കാനാവില്ലെന്നുമായിരുന്നു സംവിധായകൻ ഓം റാവത്തിന്റെ പ്രതികരണം.
നിലവിൽ പ്രേക്ഷകർക്കായി 60 തിയറ്ററുകളിൽ 3ഡി ടീസർ പ്രദർശിപ്പിക്കുമെന്നാണ് വിവരം . പ്രഭാസ് ശ്രീരാമനാവുന്ന ചിത്രത്തിൽ രാവണനാവുന്നത് സെയ്ഫ് അലി ഖാൻ ആണ്. സീതയാവുന്നത് കൃതി സനോണും. ഹിന്ദിക്കു പുറമെ തെലുങ്ക്, തമിഴ്, കന്നഡ, മലയാളം ഭാഷകളിലും ചിത്രം പ്രദർശനത്തിന് എത്തും. ഐമാക്സ് 3ഡി ഫോർമാറ്റിലും ചിത്രം ആസ്വദിക്കാനാവും. ജനുവരി 12 ന് ആണ് റിലീസ്.
