ആപ്പിൾ മുതൽ തക്കാളിവരെ, ഈ പഴങ്ങളുടെ കുരു കഴിക്കല്ലേ? അപകടം നിങ്ങളുടെ പിന്നാലെയുണ്ട്

പഴങ്ങൾ കഴിക്കാൻ ഇഷ്ടമല്ലാത്ത അധികമാരും കാണില്ല. വിവിധ നിറങ്ങളിൽ രുചികളിൽ പഴങ്ങളിങ്ങനെ കാണുമ്പോൾ ആരായാലും ഒന്ന് രുചിച്ചുപോകും. ജ്യൂസായും ജാമായും കേക്ക് ആയും അങ്ങനെ പലരീതിയിൽ പഴങ്ങൾ നമ്മൾ കഴിക്കുന്നു. ഓരോ സീസണിലും ഓരോ പഴങ്ങൾ മരം നിറച്ച് കായ്ച്ച് കിടക്കുന്നത് തന്നെ എന്ത് രസമാണെന്നല്ലേ?എന്നാൽ ഇങ്ങനെ ആസ്വദിച്ച് കഴിക്കുമ്പോൾ ചില പഴങ്ങളുടെ കുരു കഴിക്കാതിരിക്കാൻ ശ്രദ്ധിക്കണം. കാരണം അവ പലതരത്തിലുള്ള അപകടങ്ങളാണ് നമ്മുടെ ശരീരത്തിൽ ഉണ്ടാക്കുന്നത്.

ആപ്പിൾ കുരു

അമിഗ്ഡാലിൻ എന്ന വസ്തു അടങ്ങിയിട്ടുള്ള ആപ്പിൾ കുരു അത്യന്തം വിഷമയമായ ഒന്നാണ്. ഈ വിത്തുകൾ ശരീരത്തിൽ എത്തിയാൽ
ഹൈഡ്രജൻ സയനൈഡ് എന്ന രാസവസ്തു പുറത്ത് വിടും. ഇതാണ് മരണത്തിലേക്ക് നയിക്കുന്നത്. എന്നാൽ ചെറിയ അളവിൽ ആപ്പിൾ കുരു ശരീരത്തിൽ എത്തിയാൽ ഒന്നും സംഭവിക്കില്ല. ഒരു കിലോഗ്രാം ഭാരത്തിന് 1.52 മില്ലിഗ്രാം എന്ന കണക്കിൽ ഹൈഡ്രജൻ സയനൈഡ് ഉള്ളിലെത്തിയാൽ മാത്രമേ മരണത്തിന് കാരണമാകുകയുള്ളൂ.

തക്കാളി വിത്ത്
തക്കാളിയിലെ കുരു കഴിക്കുന്നത് വൃക്കയിൽ കല്ലുകളുണ്ടാകാൻ കാരണമാകാമെന്ന് ചില പഠനങ്ങൾ ചൂണ്ടിക്കാട്ടുന്നു. തക്കാളിക്കുരുവിൽ അടങ്ങിയിട്ടുള്ള ഓക്‌സലേറ്റാണ് ഇതിന് കാരണമാകുന്നത്. എല്ലാ ദിവസവും വലിയ അളവിൽ തക്കാളി കുരു ശരീരത്തിൽ എത്തിയാൽ മാത്രമേ ഇത് സംഭവിക്കുകയുള്ളൂ.

വൻപയർ
ഫൈറ്റോഹെമഗ്ലൂട്ടിനിൻ എന്ന രാസവസ്തു അടങ്ങിയ വൻപയർ പാകം ചെയ്യാതെ പച്ചയ്‌ക്ക് കഴിക്കുന്നത് രക്തകോശങ്ങൾ ഒട്ടിച്ചേരാൻ കാരണമായേക്കും. ശരിയായി പാകം ചെയ്യാതെ വൻപയർ കഴിക്കുന്നത് അതിസാരത്തിലേക്കും നയിക്കാം.

ലിച്ചി കുരു

മനുഷ്യശരീരത്തിന് ഹാനികരമായ പ്രകൃതിദത്ത ടോക്‌സിനുകൾ അടങ്ങിയിട്ടുള്ള ഒന്നാണ് ലിച്ചിക്കുരു.രക്തത്തിലെ പഞ്ചസാരയുടെ തോതിനെ കാര്യമായി ബാധിക്കാനും തലച്ചോറിൽ നീർക്കെട്ടുണ്ടാക്കാനും കഴിയുന്ന ഒരു തരം അമിനോ ആസിസും ലിച്ചി കുരുവിൽ അടങ്ങിയിട്ടുള്ളതായി പഠനങ്ങൾ ചൂണ്ടിക്കാണിക്കുന്നു. ഇവയെ കൂടാതെ ആപ്രിക്കോട്ട്,പ്ലം,പീച്ച്, ചെറി എന്നീ സയനോജെനിക് സംയുക്തം അടങ്ങിയ പഴങ്ങളുടെ വിത്തുകൾ പരമാവധി ഒഴിവാക്കുന്നതാണ് നല്ലത്.

ഇതിന് പകരം ചിയ,സൂര്യകാന്തി വിത്ത്,ഫ്‌ളാക്‌സ് സീഡുകൾ എന്നിവ കഴിക്കാം