ഒരു തുന്നൽക്കാരനായി മലയാള സിനിമയിലേയ്‌ക്ക് കടന്നുവന്ന് ഹാസ്യവേഷങ്ങളിലൂടെ മലയാളികളുടെ മനസ്സ് കവർന്ന നടനാണ് ഇന്ദ്രൻസ്. അടുത്തിടെ ശക്തമായ കഥാപാത്രങ്ങളിലൂടെ തന്നിലെ മികച്ച നടനെയും പ്രേഷകർക്കു മുന്നിൽ അവതരിപ്പിച്ച് താരം കൈയ്യടി നേടി. വീണ്ടും ശക്തമായ ഒരു കഥാപാത്രമായി മലയാളികൾക്കു മുന്നിൽ എത്താൻ ഒരുങ്ങുകയാണ് ഇന്ദ്രൻസ്. ഷാബു ഉസ്മാൻ സംവിധാനം ചെയ്യുന്ന ലൂയിസ് എന്ന സിനിമയിൽ താരം ഞെട്ടിക്കുമെന്ന് ഉറപ്പ്. ചിത്രത്തിന്റെ ആകാംക്ഷയുണർത്തുന്ന ടീസർ അണിയറ പ്രവർത്തകർ പുറത്തു വിട്ടു. ത്രില്ലർ വിഭാഗത്തിൽപ്പെടുന്ന ചിത്രത്തിൽ ലൂയിസ് എന്ന കേന്ദ്രകഥാപാത്രമായാണ് ഇന്ദ്രൻസ് എത്തുക. താൻ അഭിനയിച്ചതിൽ നിന്നും തികച്ചും വ്യത്യസ്തമായ വേഷമാണ് ലൂയിസിലേത് എന്ന് നടൻ നേരത്തെ തന്നെ വ്യക്തമാക്കിയിരുന്നു.
സായ്‌കുമാർ, ജോയ് മാത്യൂ, മനോജ് കെ ജയൻ, അശോകൻ, അജിത്ത് കൂത്താട്ടുകുളം, അസിസ്, രോഹിത്, അൽസാബിദ്, ആദിനാട് ശശി, ആസ്റ്റിൻ, കലാഭവൻ നവാസ്‌, ശശാങ്കൻ, രാജേഷ് പറവൂർ, ബിട്ടു തോമസ്, സിയാദ് അബ്ദുള്ള, ലെന, ദിവ്യാ പിള്ള, സ്മിനു സിജോ, മീനാക്ഷി, ടെസ്സ തുടങ്ങിയ മലയാള സിനിമയിൽ പ്രമുഖ താരങ്ങളും ലൂയിസിൽ അഭിനയിക്കുന്നു. മനുഗോപാലാണ് ചിത്രത്തിന്റെ തിരക്കഥ എഴുതിയിരിക്കുന്നത്. കൊട്ടുപള്ളിൽ മൂവീസ് പ്രൊഡക്ഷന്റെ ബാനറിൽ റ്റിറ്റി എബ്രഹാം കൊട്ടുപള്ളിൽ ആണ് സിനിമ നിർമ്മിക്കുന്നത്.
ഛായാഗ്രഹണം-ആനന്ദ് കൃഷ്ണ, അസോസിയേറ്റ് ഡയറക്ടർ -ഷിബു ഗംഗാധരൻ, സംഗീതം-ജാസി ഗിഫ്റ്റ്, രാജീവ് ശിവ, ഗാനരചന-മനു മൻജിത്ത്, ഷാബു ഉസ്മാൻ കോന്നി, ആലാപനം- നിത്യ മാമ്മൻ, ശ്രേയ, ജാസി ഗിഫ്റ്റ്, എഡിറ്റർ- നൗഫൽ അബ്ദുള്ള, പശ്ചാത്തല സംഗീതം- റോണി റാഫേൽ, ആർട്ട് -സജി മുണ്ടയാട്, മേക്കപ്പ്-പട്ടണം ഷാ, വസ്ത്രാലങ്കാരം -രവി കുമാരപുരം, പ്രൊഡക്ഷൻ കൺട്രോളർ-ഹസ്മീർ നേമം എന്നിവരാണ് മറ്റ് അണിയറ പ്രവർത്തകർ. ചിത്രം നവംബർ 4-ന് റിലീസിന് ചെയ്യും.
