പച്ചക്കറി കിറ്റുമായി പൊട്ടിച്ചിരിച്ച് മമിത ബൈജു, കൈയിൽ വാഴച്ചുണ്ടുമായി സംഗീത് പ്രതാപ്. യുവാക്കൾക്കിടയിൽ ഏറെ ആരാധകരുള്ള താരങ്ങളുടെ ഈ കൗതുകകരമായ ലുക്കാണ് ‘ഹലോ ഡിയർ’ എന്ന ചിത്രത്തിന്റെ സെക്കൻഡ് ലുക്ക് പോസ്റ്ററിന്റെ ശ്രദ്ധാകേന്ദ്രം. വ്യത്യസ്തമായ അവതരണവുമായി എത്തിയ പോസ്റ്റർ ഇതിനോടകം നവമാധ്യമങ്ങളിൽ ശ്രദ്ധ നേടുകയാണ്.
2027 ജനുവരി 19-ന് ലോകമെമ്പാടുമുള്ള തിയേറ്ററുകളിൽ ചിത്രം റിലീസ് ചെയ്യുമെന്നാണ് അണിയറപ്രവർത്തകർ പ്രഖ്യാപിച്ചിരിക്കുന്നത്. ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാൻ നിർമിക്കുന്ന ചിത്രം ഡിനോയ് പൗലോസ് തിരക്കഥയെഴുതി സംവിധാനം ചെയ്യുന്നു. മെട്രോ നഗരത്തിന്റെ പശ്ചാത്തലത്തിൽ ഒരുങ്ങുന്ന ചിത്രം പൂർണമായും റൊമാന്റിക് കോമഡി ജോണറിലാണ് അവതരിപ്പിക്കുന്നത്. ചിരിപ്പിക്കുന്ന മുഹൂർത്തങ്ങൾക്കൊപ്പം കഥാഗതിയിൽ നിർണായകമാകുന്ന വഴിത്തിരിവുകളും ചിത്രത്തിലുണ്ടാകുമെന്നാണ് സൂചന.
സംഗീത് പ്രതാപിനും മമിത ബൈജുവിനും പുറമേ സുരേഷ് കൃഷ്ണയും പ്രധാന വേഷത്തിലെത്തുന്നു. മറ്റ് പ്രമുഖ താരങ്ങളും ചിത്രത്തിന്റെ ഭാഗമാണ്. അഖിൽ ജോർജാണ് ഛായാഗ്രഹണം. ചമൻ ചാക്കോ എഡിറ്റിംഗും നിമിഷ് എം. താനൂർ കലാസംവിധാനവും നിർവഹിക്കുന്നു. മേക്കപ്പ് റോണക്സ് സേവ്യർ, കോസ്റ്റ്യൂം ഡിസൈൻ മഷർ ഹംസ. വിഷ്ണു ഗോവിന്ദാണ് സൗണ്ട് ഡിസൈൻ.
കൊച്ചിയിൽ ചിത്രീകരണം പൂർത്തിയാക്കിയ ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. സെൻട്രൽ പിക്ചേഴ്സാണ് ചിത്രം പ്രദർശനത്തിനെത്തിക്കുന്നത്.
