ന്യൂഡൽഹി: വിമാനത്തിനുള്ളിൽ നിന്നും പുകപടലങ്ങൾ ഉയർന്നതിനെ തുടർന്ന്, ഗോവയിൽ നിന്നും ഹൈദരാബാദിലേക്ക് പോയ സ്പൈസ് ജെറ്റ് ഫ്ലൈറ്റ് ഹൈദരാബാദ് വിമാനത്താവളത്തിൽ ലാൻഡ് ചെയ്യുന്നതിന് മുൻപ്, അടിയന്തിരമായി നിലത്തിറക്കി. യാത്രക്കാരെ അടിയന്തിരമായി വിമാനത്തിനുള്ളിൽ നിന്നും പുറത്തിറക്കി. വിമാനം അടിയന്തിരമായി ഇറക്കുന്നതിനുള്ള എല്ലാ ക്രമീകരണങ്ങളും വിമാനത്താവളം അധികൃതർ തയ്യാറാക്കിയിരുന്നു.
ഹൈദരാബാദ് വിമാനത്താവളത്തിന്റെ ടാക്സിവേയിൽ വിമാനം അടിയന്തിരമായി ഇറക്കിയതിന്റെ ആഘാതത്തിൽ ഒരു യാത്രക്കാരന്റെ കാലിന് നിസ്സാര പരിക്ക് പറ്റി. പുകപടലങ്ങൾ ഉയർന്നതിന്റെ കാരണം വ്യക്തമല്ല. സംഭവത്തിൽ ഡിജിസിഎ അന്വേഷണത്തിന് ഉത്തരവിട്ടു.
ഏതാണ്ട് ഇരുപത് മിനിട്ട് നേരത്തേക്ക് വിമാനത്തിനുള്ളിൽ അസന്തുലിതാവസ്ഥ ആയിരുന്നുവെന്നും, യാത്രക്കാർ പരിഭ്രാന്തരായിരുന്നുവെന്നും, വിമാനത്തിലുണ്ടായിരുന്നവർ മാദ്ധ്യമങ്ങളോട് പറഞ്ഞു. സ്പൈസ് ജെറ്റിന്റെ ക്യു400 (വിടി- എസ് ബി ക്യു) വിമാനത്തിലാണ് പുകപടലങ്ങൾ ഉയർന്നത്.
