കാറുകൾക്ക് ആരാധകർ ഏറെയാണ്. വിപണികളിൽ പലപ്പോഴും പഴയതും പുതിയതുമായ കാറുകൾ സ്വന്തമാക്കാൻ ഉപഭോക്താക്കൾ തമ്മിൽ മത്സരമാണ്. കൂടാതെ പുതിയ വാഹനങ്ങൾ സ്വന്തമാക്കുന്ന താരങ്ങളും ഗായകരും വാർത്തകളിൽ ഇടം നേടാറുമുണ്ട്.എന്നാൽ ഇവരിൽ നിന്ന് വ്യത്യസ്തനായി 22 വർഷം പഴക്കമുള്ള മാരുതി 800 നിരത്തിലിറക്കി വാർത്തകളിൽ ഇടം നേടുകയാണ് ഗായകൻ എംജി ശ്രീകുമാർ.
ഗായകൻ എന്ന നിലയിലുള്ള വരുമാനം കൊണ്ട് 22 വർഷം മുൻപാണ് ഈ മാരുതി 800 എം ജി ശ്രീകുമാർ വാങ്ങുന്നത്. അതിനാൽ തന്നെ അദ്ദേഹത്തിന് ഇത് വെറുമൊരു കാറല്ല. തമിഴ്നാട് രജിസ്ട്രേഷനിസലുള്ള കാറ് ചെന്നൈയിലാണ് അദ്ദേഹം ഉപയോഗിച്ചിരുന്നത്.
പണ്ട് ഒന്നരലക്ഷത്തിനു വാങ്ങിയ ഈ വണ്ടിയിലാണ് നരസിംഹത്തിലെ പഴനിമല മുരുകന് ഹരോഹര.. ഗാനം ഉൾപ്പെടെ നിരവധി ഗാനങ്ങൾ പാടാൻ അദ്ദേഹം പോയിരുന്നത്. മോഹൻലാലും പ്രിയദർശനും രവീന്ദ്രനും ഔസേപ്പച്ചനും ഒക്കെ പലതവണ ഈ കാറിൽ യാത്ര ചെയ്തിട്ടുണ്ട്. അങ്ങനെ നീളുന്നു എംജിയുടെ ഓർമ്മകൾ.
നിലവിൽ കൊല്ലം അയത്തിൽ എസ്എസ് ഡീറ്റെയ്ലിങ് സ്റ്റുഡിയോയിലാണ് കാറിനെ മിനുക്കി ഇറക്കിയത്. ചുവന്ന കാർ വെള്ളയായി. എന്തായാലും ഈ പടക്കുതിര ഇനിയും പായും എംജിയോടൊപ്പം.
