തിരുവനന്തപുരം:വിദേശപര്യടനത്തിന് ശേഷം മുഖ്യമന്ത്രി പിണറായി വിജയൻ കേരളത്തിൽ തിരിച്ചെത്തി. കുടുംബസമേതമാണ് അദ്ദേഹം തിരിച്ചെത്തിയത്.ദുബായിൽ നിന്ന് അദ്ദേഹം തിരുവനന്തപുരത്താണ് തിരിച്ചെത്തിയത്. ആരോഗ്യ മന്ത്രി വീണാ ജോർജും മടങ്ങിയെത്തിയിട്ടുണ്ട്.
നിക്ഷേപം ലക്ഷ്യം വെച്ചുള്ള വിദേശ പര്യടനത്തിൽ കുടുംബത്തെ ഒപ്പം കൊണ്ട് പോയതടക്കം മുഖ്യമന്ത്രിയുടെ യൂറോപ്പ് യാത്ര ഏറെ വിവാദങ്ങൾക്ക് കാരണമായിരുന്നു. യൂറോപ്പിൽ നിന്ന് യാത്ര അവസാന നിമിഷം ദുബായിലേക്ക് നീട്ടിയതും വിമർശനങ്ങൾക്ക് കാരണമായിരുന്നു.
വിദേശ പര്യടനത്തിൽ ഉദ്യോഗസ്ഥരെ ഒപ്പം കൂട്ടുന്നതിന് പുറമെ മുഖ്യമന്ത്രിയുടേയും മന്ത്രിമാരുടേയും കുടുംബാംഗങ്ങൾ എന്തിനെന്നായിരുന്നു പ്രധാനമായും ഉയർന്ന വിമർശനം. സംസ്ഥാനത്തിന്റെ കടം കുത്തനെ പെരുകുമ്പോഴാണ് മുഖ്യമന്ത്രി കുടുംബ സമേതം യൂറോപ്പ് പര്യടനത്തിന് പോയത്. എന്നാൽ കുടുംബാംഗങ്ങളുടെ യാത്ര സ്വന്തം ചെലവിലാണെന്നാണ് സർക്കാർ വൃത്തങ്ങൾ വിശദീകരിക്കുന്നത്.
മന്ത്രിമാരുടെ വിദേശയാത്ര സംബന്ധിച്ചുള്ള വിമർശനങ്ങൾ സിപിഎം നേതാക്കൾ തള്ളിയിരുന്നു.നിക്ഷേപം വർദ്ധിപ്പിക്കാനും നാടിന്റെ വികസനത്തിന് വേണ്ടിയുമാണ് യാത്രയെന്നായിരുന്നു സിപിഎം സംസ്ഥാന സെക്രട്ടറി എംവി ഗോവിന്ദന്റെ വാദം.
Comments