ചെന്നൈ: രാജ്യത്ത് വീണ്ടും ആഭിചാര കൊലയ്ക്ക് ശ്രമം. തമിഴ്‌നാട് തിരുവണ്ണാമലയൽ ആറണിയ്‌ക്കടുത്താണ് ആഭിചാര കൊലയ്ക്ക് ശ്രമം നടന്നത്. നിലവിളിച്ച് ഭീതിപ്പെടുത്തുന്ന നിലയിൽ ആഭിചാരക്രിയകൾ നടത്തിയതോടെ നാട്ടുകാർ പോലീസിനെ അറിയിക്കുകയായിരുന്നു. പോലീസെത്തി വാതിൽ തകർത്താണ് ആഭിചാര കൊല നടത്താനുള്ള ശ്രമം തടഞ്ഞത്. സംഭവത്തിൽ ആറ് പേരെ പോലീസ് അറസ്റ്റ് ചെയ്തു.
നാട്ടുകാർ നൽകിയ വിവരത്തെ തുടർന്ന് പോലീസെത്തി ആഭിചാര ക്രിയയിൽ ഏർപ്പെട്ടിരിക്കുന്നവരോട് കതക് തുറക്കാൻ ആവശ്യപ്പെട്ടെങ്കിലും ഇവർ വിസ്സമതിക്കുകയായിരുന്നു. തങ്ങൾ പൂജ നടത്തുകയാണെന്നും തടസ്സപ്പെടുത്തരുതെന്നും ആക്രോശിച്ചു.
ഒരു മനുഷ്യബലി കൂടി നടത്താനുണ്ടെന്നും തടസ്സപ്പെടുത്തിയാൽ കഴുത്ത് അറത്ത് മരിക്കുമെന്നും ഇവർ ഭീഷണിപ്പെടുത്തി. പിന്നാലെ പോലീസ് ജെസിബി ഉപയോഗിച്ച് വാതിൽ തകർത്ത് അകത്ത് കയറുകയായിരുന്നു. അകത്തു കടന്ന പോലീസ് രക്തത്തിൽ കുളിച്ചു കിടക്കുന്ന പ്രതികളെ പിടികൂടുകയായിരുന്നു. ആഭിചാര ക്രിയക്ക് നേതൃത്വം നൽകിയ ദുർമന്ത്രവാദിയെയും പോലീസ് പിടികൂടി.
