രസകരമായ നിരവധി അഭിനയ മുഹൂർത്തങ്ങൾ സമ്മാനിച്ച് പ്രേക്ഷകരുടെ മനസിൽ ഇടം നേടിയ നടിയാണ് മോളി ജോസഫ് കണ്ണമാലി. സിനിമയിലും ടെലിവിഷൻ പരമ്പരകരളിലുമായി മോളിവുഡിൽ തന്റെ വ്യക്തിമുദ്ര പതിപ്പിച്ച ഇവർ 2009ൽ പുറത്തിറങ്ങിയ കേരള കഫേയിലൂടെയാണ് സിനിമാ രംഗത്തേക്ക് കടന്നുവരുന്നത്. പുതിയ തീരങ്ങൾ, അമർ അക്ബർ ആന്റണി എന്നീ ചിത്രങ്ങളിലെ കഥാപാത്രങ്ങളും മോളി കണ്ണമാലിക്ക് വലിയ സ്വീകാര്യത നൽകിയിട്ടുണ്ട്. ടെലിവിഷൻ പരമ്പരയിലെ ‘ചാള മേരി’ എന്ന കഥാപാത്രമാണ് മോളി കണ്ണമാലിയെ ജനപ്രിയയാക്കിയത്. ഇപ്പോഴിതാ ഒരു ഇംഗ്ലീഷ് ചിത്രത്തിലും അഭിനയിക്കാൻ തുടങ്ങിയിരിക്കുകയാണ് നടി.
ഓസ്ട്രേലിയൻ ചലച്ചിത്ര രംഗത്ത് പ്രവർത്തിക്കുന്ന മലയാളിയായ ജോയ് കെ. മാത്യു സംവിധാനം ചെയ്യുന്ന ‘ടുമാറോ’ എന്ന ഇംഗ്ലീഷ് സിനിമയിലാണ് മോളിക്ക് അവസരം ലഭിച്ചിരിക്കുന്നത്. ഏഴ് കഥകൾ അടങ്ങിയ ഒരു ആന്തോളജി ചിത്രമാണ് ടുമാറോ. സഹകരണത്തിന്റെയും സ്നേഹത്തിന്റെയും മുഹൂർത്തങ്ങളെ മനോഹരമായി അവതരിപ്പിക്കുന്ന ചിത്രമാകും ടുമാറോയെന്ന് സിനിമയുടെ അണിയറ പ്രവർത്തകർ പറയുന്നു.
സിനിമയുടെ ചിത്രീകരണം തിരുവനന്തപുരത്ത് ആരംഭിച്ചു. ചിത്രത്തിന്റെ രചനയും നിർമാണവും ജോയ് കെ മാത്യു തന്നെയാണ് നിർവഹിക്കുന്നത്. തിരുവനന്തപുരത്ത് നടന്ന ചിത്രത്തിന്റെ പൂജയ്ക്ക് ശേഷം ഗതാഗതവകുപ്പ് മന്ത്രി ആന്റണി രാജു ഉദ്ഘാടനം നിർവഹിച്ചു. സെൻസർ ബോർഡ് അംഗവും എഴുത്തുകാരിയുമായ ഗിരിജ സേതുനാഥ് ഭദ്രദീപ പ്രകാശനം നടത്തി.
