ഗാന്ധിനഗർ: രാജ്യത്തിന്റെ സുരക്ഷ വർദ്ധിപ്പിക്കാനൊരുങ്ങി കേന്ദ്രം. സുരക്ഷ ശക്തിപ്പെടുത്തുന്നതിന്റെ ഭാഗമായി ഇന്ത്യ-പാക് അതിർത്തിയിൽ നിർമ്മിക്കുന്ന വ്യോമതാവളത്തിന്റെ തറക്കല്ലിടൽ പ്രധാനമന്ത്രി നരേന്ദ്ര മോദി നിർവഹിച്ചു. ഗുജറാത്തിലെ ദീസയിലാണ് വ്യോമതാവളം സ്ഥാപിക്കുന്നത്.
ഗുജറാത്ത് വൈകാതെ തന്നെ രാജ്യത്തിന്റെ സുരക്ഷയുടെ കേന്ദ്രമായി മാറുകയും നിർണായക പങ്ക് വഹിക്കുകയും ചെയ്യുമെന്നും അദ്ദേഹം ആത്മവിശ്വാസം പ്രകടിപ്പിച്ചു. അതിർത്തിയിൽ നിന്നും 130 കിലോ മീറ്റർ അകലെയാണ് ദീസ. വിവിധ സേനകൾ അതിർത്തിയിൽ തുടരുമ്പോൾ പടിഞ്ഞാറൻ ഭാഗത്ത് നിന്നുമുണ്ടാകുന്ന ഭീഷണിയെ ചെറുക്കാൻ വ്യോമതാവളം വഴി സാധ്യമാകുമെന്നും പ്രധാനമന്ത്രി വ്യക്തമാക്കി.
നരേന്ദ്ര മോദി മുഖ്യമന്ത്രിയായിരുന്ന കാലം മുതൽ വ്യോമതാവളത്തിന്റെ പ്രവർത്തനങ്ങൾക്കായി പ്രവർത്തിച്ചിരുന്നു. 2000-ത്തിലാണ് ഇതിനായി ഭൂമി അനുവദിച്ച് കിട്ടിയതെന്നും അദ്ദേഹം ചൂണ്ടിക്കാട്ടി. അനുകൂല നടപടിയ്ക്കായി അന്നത്തെ കേന്ദ്ര സർക്കാരിനെ സമീപിച്ചിരുന്നെങ്കിലും നിരാശയായിരുന്നു ഫലമെന്നും അദ്ദേഹം പറഞ്ഞു. പിന്നീട് ബിജെപി കേന്ദ്രത്തിൽ അധികാരത്തിലേറിയപ്പോഴും വളരെ വൈകി മാത്രമാണ് നടപടികൾ പൂർത്തികരിക്കാനായതെന്നും മോദി വ്യക്തമാക്കി.
Comments