തിരുവനന്തപുരം: ധനമന്ത്രി കെ.എൻ.ബാലഗോപാലനെ മന്ത്രി സ്ഥാനത്തു നിന്ന് നീക്കണമെന്നുള്ള ഗവർണർ ആരിഫ് മുഹമ്മദ് ഖാന്റെ നിലപാടിന് പിന്നാലെ ഗവർണർക്കെതിരെ പരിഹാസവുമായി എ.കെ.ബാലൻ. ഗവർണർക്ക് ഇപ്പോളുള്ളത് പ്ലഷറിന്റെ പ്രശ്നമല്ല, പ്രഷറിന്റെ പ്രശ്നമാണെന്നാണ് എ.കെ.ബാലന്റെ പരിഹാസം. എത്രയും വേഗം ഡോക്ടറെ കാണിച്ച ശേഷം ഡെൽമ 40 കഴിക്കണമെന്നും അദ്ദേഹം പ്രതികരിച്ചു.
ഗൗരവത്തിൽ കാണേണ്ട ഒരു പ്രശ്നവും ഇതിലില്ല. പറയുന്നതെല്ലാം ഗൗരവത്തിൽ കണ്ട് നമ്മൾ പ്രതികരിക്കുന്നത് കൊണ്ടാണ് ഓരോ ദിവസവും ഗവർണർ ഓരോന്ന് പറഞ്ഞു കൊണ്ടിരിക്കുന്നതെന്നുമാണ് എ.കെ.ബാലൻ പറയുന്നത്. പി.എസ്.റാവു മുതൽ ഇപ്പോൾ ആരിഫ് മുഹമ്മദ് ഖാൻ വരെ ഇരുപത്തിയെട്ട് പേർ ഗവർണർ കസേരയിൽ ഇരുന്നിട്ടുണ്ട്.
മുമ്പുള്ള ഗവർണർമാർക്ക് ആർക്കും തോന്നാത്ത ഒരു കാര്യം ആരിഫ് മുഹമ്മദ് ഖാന് ഇടയ്‌ക്കിടയ്‌ക്ക് തോന്നുന്നതിന്റെ പ്രധാനപ്പെട്ട ഒരു കാരണം ആർഎസ്എസുകാരന്റെ വീട്ടിൽ പോയിട്ട് ഭക്ഷണം കഴിച്ചതാണ്. അദ്ദേഹം ഒരിക്കലും പോകാൻ പാടില്ലായിരുന്നു. പ്രഷറാണ് വേണ്ടാത്ത തോന്നലുണ്ടാകുന്നതിന്റെ പ്രധാനപ്പെട്ട കാരണമെന്നും എ.കെ.ബാലൻ വിമർശിച്ചു.
Comments