ഫ്രാങ്ക്ഫർട്ട് : വിമാനത്തിൽ സാധനങ്ങൾ സൂക്ഷിക്കുന്ന സ്ഥലത്ത് നിന്നും അജ്ഞാത മൃതദേഹം കണ്ടെത്തി. ഇറാനിൽ നിന്ന് ജർമനിയിലേക്ക് പറന്ന വിമാനത്തിലാണ് ഇത് കണ്ടെത്തിയത്. ടെഹ്റാനിൽ നിന്ന് ഫ്രാങ്ക്ഫർട്ടിലേക്ക് പറന്ന വിമാനത്തിൽ പതിവ് സുരക്ഷാ പരിശോധന നടത്തുന്നതിനിടെയാണ് ഇത് കണ്ടത്. ഇതിന് സമീപത്തായി ഒരു ഓക്സിജൻ സിലിണ്ടറും കണ്ടെത്തിയിട്ടുണ്ട്.
സുരക്ഷാ പരിശോധനയ്ക്കിടെ നടത്തിയ അറ്റകുറ്റപ്പണികൾക്കിടെയാണ് മൃതദേഹം കണ്ടെടുത്തത് എന്ന് ഫ്രാങ്ക്ഫർട്ട് വിമാനത്താവളത്തിലെ അധികൃതർ പ്രസ്താവനയിൽ അറിയിച്ചു. തുടർന്ന് ജർമൻ പോലീസ് സ്ഥലത്തെത്തി അന്വേഷണം ആരംഭിച്ചു. പുരുഷനാണ് മരിച്ചത് എന്നാണ് വിവരം.
ഇറാനിൽ 22 കാരിയായ മഹ്സ അമിനിയുടെ കൊലപാതകവുമായി ബന്ധപ്പെട്ട് പ്രക്ഷോഭം ആളിക്കത്തുകയാണ്. ഹിജാബിന്റെ പേരിൽ സ്ത്രീകൾക്ക് നേരെ നടക്കുന്ന അതിക്രമങ്ങൾക്കെതിരെയാണ് പ്രതിഷേധം. ഇവിടെ നിന്നും അനധികൃതമായി യാത്ര ചെയ്യാൻ ശ്രമിച്ചയാളാകാം ഇത് എന്നാണ് പ്രാഥമിക നിഗമനം. അതിനാൽ യാത്രാ നിയന്ത്രണം കടുപ്പിക്കാനൊരുങ്ങുകയാണ് ജർമനി.
