ന്യൂഡൽഹി : യുകെ പ്രധാനമന്ത്രിയും ഇന്ത്യൻ വംശജനുമായ ഋഷി സുനകിനെ പ്രകീർത്തിച്ച് ഇന്ത്യയിലെ ബ്രിട്ടീഷ് ഹൈക്കമ്മീഷണർ അലക്സ് എല്ലിസ്. സുനക് കഴിവുള്ള ഒരു വ്യക്തിയാണെന്നും അതുകൊണ്ടാണ് ബ്രിട്ടീഷ് പ്രധാനമന്ത്രി സ്ഥാനത്ത് എത്തിയത് എന്നും അലക്സ് പറഞ്ഞു.
സുനക് പഞ്ചാബ് സ്വദേശിയാണ്, ഹിന്ദുവാണ്. എന്നാൽ അദ്ദേഹത്തിന്റെ ഹൃദയവും മനസും ബ്രിട്ടീഷുകാരന്റേതാണെന്നും അലക്സ് കൂട്ടിച്ചേർത്തു. ദേശീയ ചാനലിന് നൽകിയ അഭിമുഖത്തിലാണ് പരാമർശം.
ഇന്ന് യുകെ തികച്ചും വൈവിധ്യമാർന്ന സ്ഥലമാണ്. ആ രാജ്യത്തിന്റെ ഉന്നത പദവിയിലെത്താൻ സുനകിന് സാധിച്ചത് മികച്ച കഴിവുള്ളതുകൊണ്ട് തന്നെയാണ്. രാജ്യത്തെ പ്രതിസന്ധി ഘട്ടത്തിൽ നിന്നും കരകയറ്റാനും മുന്നോട്ട് നയിക്കാനും സുനകിന് സാധിക്കുമെന്നും അലക്സ് പറഞ്ഞു.
മുൻ പ്രധാനമന്ത്രി ബോറിസ് ജോൺസണും പ്രധാനമന്ത്രി നരേന്ദ്ര മോദിയും തമ്മിൽ നല്ല ബന്ധമുണ്ടായിരുന്നു. ഇനിയും അങ്ങനെ തന്നെ തുടരും. ഇന്ത്യയും യുകെയുമായി മികച്ച നയതന്ത്ര ബന്ധമാണുള്ളത് എന്നും ഇന്ത്യ വളരാതെ യുകെയ്ക്ക് വളരാൻ സാധിക്കില്ലെന്നും അദ്ദേഹം ചൂണ്ടിക്കാട്ടി.
കുടിയേറ്റത്തിനും വ്യാപാര നയങ്ങൾക്കും ഇപ്പോൾ കൂടുതൽ അവസരങ്ങളുണ്ട്. ഇരു രാജ്യങ്ങളിലും കുടിയേറ്റ നിയമങ്ങൾ ഉണ്ടെന്നും നിയമാനുസൃതമായി കഴിവുള്ള ആളുകളെ ആകർഷിക്കാൻ അവസരങ്ങൾ ഒരുക്കുന്നുണ്ടെന്നും അദ്ദേഹം കൂട്ടിച്ചേർത്തു.
