ഇസ്ലാമാബാദ്: ടി20 ലോകകപ്പ് ഫൈനലിൽ പാകിസ്താൻ പരാജയപ്പെട്ടതിന് പിന്നാലെ ടീമിനെ അഭിനന്ദിച്ച് മുൻ പാകിസ്താൻ പേസർ ഷൊയ്ബ് അക്തർ. ട്വിറ്ററിൽ പങ്കുവെച്ച വീഡിയോയിലാണ് പാകിസ്താന്റെ ബൗളിംഗിനെയും പേസർമാരെയും താരം അഭിനന്ദിച്ചത്. ടീമിനെ ഫൈനലിൽ എത്തിച്ചത് ബൗളർമാരാണെന്നും അക്തർ വീഡിയോയിൽ പറയുന്നു. ഇന്ത്യയിൽ കപ്പ് ഉയർത്തുമെന്നും അദ്ദഹം അവകാശവാദം ഉന്നയിക്കുന്നുണ്ട്.
‘പാകിസ്താൻ ബൗളിംഗ് നന്നായി ചെയ്തു. ലോകകപ്പിൽ ഉടനീളം നിങ്ങൾ മികച്ച പ്രകടനം കാഴ്ച്ച വെയ്ക്കുകയും പാകിസ്താനെ ഫൈനലിലെത്തിക്കുകയും ചെയ്തു. ഭാഗ്യം തുണച്ചില്ലെങ്കിലും പാകിസ്താൻ നന്നായി കളിച്ചു. ഷഹീനിന്റെ പരിക്കാണ് പ്രധാന പ്രശ്നം, പക്ഷേ വിഷമിക്കേണ്ട. പാകിസ്താൻ തല താഴ്ത്തേണ്ട ആവശ്യമില്ല’ എന്ന് അക്തർ വീഡിയോയിൽ പറഞ്ഞു.
Dil dukha hai lekin, toota toh nahi hai. pic.twitter.com/E9fFbpECZe
— Shoaib Akhtar (@shoaib100mph) November 13, 2022
‘ഞാൻ നിങ്ങളോടൊപ്പം ഉണ്ട്. രാജ്യം മുഴുവൻ പാകിസ്താൻ ടീമിന് പിന്നിലുണ്ട്. ഈ പരാജയം വേദനപ്പിക്കുന്നുണ്ട്. എന്നാൽ ഇൻഷാ അല്ലാഹ്, നമ്മൾ ഇന്ത്യയിൽ ലോകകപ്പ് നേടും’ എന്നു പറഞ്ഞു കൊണ്ടാണ് അക്തർ വീഡിയോ അവസാനിപ്പിക്കുന്നത്. പാകിസ്താനെ 5 വിക്കറ്റിന് തകർത്താണ് ട്വന്റി 20 ലോകകപ്പ് ഇംഗ്ലണ്ട് സ്വന്തമാക്കിയത്. ബൗളിംഗിലും ഫീൽഡിംഗിലും ബാറ്റിംഗിലും വ്യക്തമായ ആധിപത്യം ഇംഗ്ലണ്ട് പുലർത്തി. ആദ്യം ബാറ്റിംഗിനിറങ്ങിയ പാകിസ്താന് 20 ഓവറിൽ 8 വിക്കറ്റ് നഷ്ടത്തിൽ 137 റൺസ് മാത്രമെ എടുക്കാൻ കഴിഞ്ഞിരുന്നുള്ളു.
