ജീവിതത്തിൽ പല അവസരങ്ങളിലും ശരിയായ തീരുമാനങ്ങൾ എടുക്കാൻ നമുക്ക് ബുദ്ധിമുട്ട് അനുഭവപ്പെടാറുണ്ട്. നിർണായക സാഹചര്യങ്ങളിൽ എടുക്കുന്ന തീരുമാനങ്ങൾ പലപ്പോഴും തെറ്റായിപ്പോകുമോ എന്ന് തോന്നാം. അങ്ങനെയുളള ചിന്തകൾ കാരണം ശരിയായ രീതിയിലുള്ള തീരുമാനത്തിൽ എത്താൻ സാധിച്ചില്ലെന്നുമിരിക്കും. എന്നാൽ നമ്മുടെ തീരുമാനങ്ങൾ തെറ്റിയാലും മുന്നോട്ട് പോകാം എന്ന ആത്മവിശ്വാസമുണ്ടെങ്കിൽ മനുഷ്യന്റെ പകുതി പ്രശ്‌നങ്ങൾ മാറുമെന്നാണ് പഠനങ്ങൾ തെളിയിക്കുന്നത്.
ഇത്തരത്തിൽ തീരുമാനം എടുക്കുന്നതിൽ ബുദ്ധിമുട്ട് വരാനുള്ള പ്രധാന കാരണം ആത്മവിശ്വാസക്കുറവാണ്. പരീക്ഷയ്‌ക്ക് ഉത്തരമെഴുതുമ്പോൾ തെറ്റിപ്പോയാൽ എന്ത് ചെയ്യുമെന്ന് പേടിക്കുന്ന കുട്ടികൾ മുതൽ പുതിയ സംരംഭമോ പദ്ധതിയോ ആരംഭിച്ചാൽ മുന്നോട്ട് കൊണ്ടുപോകാനാകുമോ എന്ന് ഭയക്കുന്നവർ വരെയുണ്ട് ഈ ലോകത്ത്. അതുകൊണ്ട് തന്നെ മനുഷ്യന്റെ പകുതിയോളം കഴിവും ഇത്തരം ആത്മവിശ്വാസക്കുറവ് കാരണം ഇല്ലാതാകുന്നു. കഴിവുണ്ടെങ്കിലും അത് തെളിയിക്കാനുള്ള അവസരങ്ങൾ തട്ടിമാറ്റുന്നതും ഈ ആത്മവിശ്വാക്കുറവാണ്.
മറ്റുള്ളവൻ തന്നെപ്പറ്റി എന്ത് ചിന്തിക്കും എന്ന പേടിയാണ് ശരിയായ തീരുമാനം എടുക്കുന്നതിന് നമ്മളിൽ പലർക്കും വിലങ്ങുതടിയാകുന്നത്. ദുരഭിമാന പ്രശ്‌നങ്ങൾ നാം എപ്പോഴും നേരിടേണ്ടി വരുന്ന ഒന്നാണ്. നമ്മുടെ പ്രവൃത്തി കാരണം മറ്റുള്ളവരിൽ നിന്ന് വിമർശനം കേൾക്കേണ്ടി വരുമെന്ന ചിന്തയും നമ്മെ സമൂഹത്തിൽ നിന്ന് പിന്നോട്ട് വലിക്കുന്നുണ്ട്. ” ഞാനത് ചെയ്താൽ തെറ്റായി പോകുമോ ‘ എന്ന ചിന്തകളാണ് ആദ്യം മാറ്റേണ്ടത്.
മറ്റുളളവരെ വിഷമിപ്പിക്കുമോ എന്ന ആധി മനസിലുണ്ടെങ്കിൽ പലപ്പോഴും നമുക്ക് അടി പതറാറുണ്ട്. താനത് പറഞ്ഞാൽ മറ്റുള്ളവർക്ക് വിഷമം ആകുമെന്ന് കരുതി കാര്യങ്ങൾ തുറന്ന് പറയാതിരിക്കുകയും പിന്നീടത് കൂടുതൽ പ്രശ്‌നങ്ങളിലേക്ക് നീങ്ങുകയും ചെയ്യുന്നു. അതിലും നല്ലത് കാര്യം തുറന്ന് പറയുകയാണ്.
ഇത്തരം മാനസിക പ്രതിസന്ധികളെ തരണം ചെയ്യാൻ നമ്മൾ തന്നെയാണ് പരിശ്രമിക്കേണ്ടത്. സ്വയം വിശ്വാസം അർപ്പിക്കുക എന്നതാണ് ഇത്തരം പ്രശ്‌നങ്ങൾക്കുള്ള പരിഹാരം. മനസിൽ എന്ത് ഭയമാണുള്ളതെന്ന് സ്വയം ചോദിക്കുക. തുടർന്ന് അത് ഒരു ബുക്കിൽ കുറിച്ച് വെയ്‌ക്കുക. നിങ്ങളുടെ പ്രശ്‌നങ്ങൾ സ്വയം മനസിലാക്കാൻ സാധിച്ചാൽ തന്നെ പകുതി പ്രശ്‌നങ്ങൾ ഒഴിവാകും. ഒരു പുതിയ സംരംഭം ആരംഭിച്ചാൽ അതിലൂടെ ഉണ്ടാകുന്ന ഗുണങ്ങളും നേരിടേണ്ടി വരുന്ന ദോഷണങ്ങളും കുറിച്ച് വെയ്‌ക്കുക. ശേഷം തനിക്ക് എതാണ് ഉചിതമെന്ന് സ്വയം ചോദിക്കണം. തുടർന്ന് മനസിലേക്ക് എന്താണോ ആദ്യം കടന്നുവരുന്നത് അത് പ്രാവർത്തികമാക്കണം. പ്രതിസന്ധികളെ എങ്ങനെ തരണം ചെയ്യാമെന്ന് ഇതിലൂടെ നാം പഠിക്കും.
തീരുമാനമെടുക്കാൻ കഴിയാത്ത അവസ്ഥകളെ നേരിടാൻ പരിശീലനത്തിലൂടെ മാത്രമേ സാധിക്കൂ. അതിനാൽ എല്ലാ ദിവസവും രാവിലെ ഒരു പത്ത് തീരുമാനങ്ങൾ എടുക്കണം. പ്രതിദിനം ചെയ്തുവരുന്ന കാര്യങ്ങളും ഇതിൽ ഉൾപ്പെടുത്താം. ഈ തീരുമാനങ്ങൾ പ്രവൃത്തിയിലൂടെ കാണിക്കണം. ഒരെണ്ണം തെറ്റിയെന്ന് പറഞ്ഞ് പിന്മാറരുത്. അടുത്ത ദിവസവും ഇത് തുടരണം, ഒരു ശീലമാകുന്നത് വരെ.
ചിലപ്പോൾ വലിയ തീരുമാനങ്ങൾ നാം നേരത്തെ എടുക്കേണ്ടിവരും. ”പത്ത് വർഷത്തിന് ശേഷം ഞാൻ എവിടെ എത്തിയിട്ടുണ്ടാകും, ഏത് കാർ വാങ്ങും, എവിടെ വീട് വെയ്‌ക്കും”… ഇത്തരത്തിലുള്ള ആഗ്രഹങ്ങളും ആവശ്യമാണ്.
ആർക്കും അടിമപ്പെടാതിരിക്കുക എന്നതാണ് ഇതിൽ പ്രധാനമായും വേണ്ടത്. ഒരു ലക്ഷ്യമുണ്ടെങ്കിൽ അതിന് വേണ്ടി പ്രവർത്തിക്കണം. മറ്റുള്ളവർ പിന്നിൽ നിന്ന് കുത്താൻ ശ്രമിച്ചാലും പ്രതിരോധിച്ചുകൊണ്ട് മുന്നോട്ട് പോകണം. തന്റെ കഴിവുകളിൽ വിശ്വസിക്കണം. കഴിവുകൾക്കനുസരിച്ച് പ്രവർത്തിക്കുകയും വേണം. എന്നാൽ തീരുമാനങ്ങൾ തെറ്റിയാൽ ഒരിക്കലും നിരാശപ്പെടേണ്ട ആവശ്യവുമില്ല. കാരണം ഈ ലോകത്ത് നമുക്ക് ആയിരം അവസരങ്ങളുണ്ട്. ഒരെണ്ണം തെറ്റിയാൽ ഒന്നും സംഭവിക്കില്ല.
