ലണ്ടൻ : യുകെയിലുള്ള ഏഷ്യൻ സമ്പന്നരുടെ പട്ടികയിൽ ഇടം നേടി ബ്രിട്ടീഷ് പ്രധാനമന്ത്രി ഋഷി സുനകും ഭാര്യ അക്ഷത മൂർത്തിയും. ഇൻഫോസിസ് സഹസ്ഥാപകൻ കൃഷ്ണമൂർത്തിയുടെ മകളാണ് അക്ഷത മൂർത്തി. സമ്പന്നരുടെ പട്ടികയിൽ 17-ാം സ്ഥാനത്താണ് ദമ്പതിമാർ. ആകെ 790 മില്യൺ പൗണ്ടാണ് ഇവരുടെ ആസ്തി.
ഹിന്ദുജ കുടുംബമാണ് പട്ടികയിൽ ഒന്നാം സ്ഥാനത്തെത്തിയിരിക്കുന്നത്. 30.5 ബില്യൺ പൗണ്ടാണ് ഇവരുടെ ആകെ ആസ്തി. വെസ്റ്റ്മിൻസ്റ്റർ പാർക്ക് പ്ലാസ ഹോട്ടലിൽ നടന്ന 24-ാമത് വാർഷിക ഏഷ്യൻ ബിസിനസ് അവാർഡിൽ, ലണ്ടൻ മേയർ സാദിഖ് ഖാൻ ‘ഏഷ്യൻ റിച്ച് ലിസ്റ്റ് 2022’ ന്റെ കോപ്പി ഹിന്ദുജ ഗ്രൂപ്പിന്റെ സഹചെയർമാൻ ഗോപിചന്ദ് ഹിന്ദുജയുടെ മകൾ റിതു ഛാബ്രിയയ്ക്ക് സമ്മാനിച്ചു. ഇന്ത്യയിൽ നിന്നുള്ള ഒരു അന്താരാഷ്ട്ര കൂട്ടായ്മയാണ് ഹിന്ദുജ ഗ്രൂപ്പ്.
തന്റെ ജീവിതത്തിലുടനീളം, ബ്രിട്ടീഷ് ഏഷ്യൻ കമ്മ്യൂണിറ്റിയുടെ കഠിനാധ്വാനവും നിശ്ചയദാർഢ്യവും സംരംഭകത്വവും നേരിട്ട് കണ്ടിട്ടുണ്ടെന്ന് ചടങ്ങിലെ മുഖ്യാതിഥിയായ ഒലിവർ ഡൗഡൻ പറഞ്ഞു. അതുകൊണ്ട് ഇതൊന്നും തന്നെ അത്ഭുതപ്പെടുത്തുന്നില്ല. തന്റെ എല്ലാ പുതിയ ജോലികളിലും തനിക്കൊരു ബ്രിട്ടീഷ് ഏഷ്യൻ ബോസ് ഉണ്ടാകും. ഇപ്പോൾ തന്റെ ഏറ്റവും അടുത്ത സുഹൃത്ത് ഋഷി സുനക് ബ്രിട്ടന്റെ ആദ്യത്തെ ഏഷ്യൻ പ്രധാനമന്ത്രിയായിരിക്കുകയാണെന്നും അദ്ദേഹം കൂട്ടിച്ചേർത്തു.
ഈ വർഷത്തെ ഏഷ്യൻ റിച്ച് ലിസ്റ്റിൽ യുകെയിൽ നിന്ന് 16 ശതകോടീശ്വരന്മാരുണ്ട്. കഴിഞ്ഞ വർഷത്തേക്കാൾ ഒരാൾ കൂടുതലാണ്. മിക്കവരും അവരുടെ സ്ഥാനം നിലനിർത്തിയിട്ടുണ്ട്. ശ്രീ പ്രകാശ് ലോഹ്യയുടെ കുടുംബത്തിനാണ് ഈ വർഷത്തെ പട്ടികയിൽ ഏറ്റവും സമ്പത്ത് വർധിച്ചത്. ഇത് 4 ബില്യൺ പൗണ്ട് വർധിച്ച് 8.8 ബില്യൺ പൗണ്ടായി.
Comments