പണിയാണ് മെയിൻ; കല്യാണ മണ്ഡപത്തിലും ലാപ്‌ടോപ്പുമായെത്തി വരൻ; വൈറലായി ചിത്രം

കൊറോണ മഹാമാരി പൊട്ടിപ്പുറപ്പെട്ടത് മുതൽ വർക്ക് ഫ്രം ഹോം എന്നത് നമുക്ക് ഒരു പുതിയ കാര്യമല്ല. ഏത് സമയത്തും എവിടെ ഇരുന്നും ജോലി ചെയ്യാൻ ആളുകൾ തയ്യാറായിക്കഴിഞ്ഞു. കഴിക്കുന്നതിനിടയിലും വിനോദ യാത്രയ്‌ക്കിടയിലും ഇരുന്ന് ജോലി ചെയ്യാൻ ഇന്ന് എല്ലാവർക്കും സാധിക്കും. എന്നാൽ വിവാഹ ദിവസവും ഇരുന്ന് ജോലി ചെയ്താൽ എന്താകും അവസ്ഥ? അതും വിവാഹ വേദിയിൽ ഇരുന്ന് തന്നെ.

വിവാഹ മണ്ഡപത്തിലിരുന്ന് ജോലി ചെയ്യുന്ന വരന്റെ ചിത്രമാണ് ഇപ്പോൾ സമൂഹമാദ്ധ്യമങ്ങളിൽ വൈറലാകുന്നത്. കൊൽക്കത്ത ഇൻസ്റ്റഗ്രാമേഴ്സ് എന്ന ഇൻസ്റ്റഗ്രാം പേജിലാണ് ചിത്രം പങ്കുവെച്ചിരിക്കുന്നത്. രണ്ട് പൂജാരിമാർ അടുത്തിരുന്ന് പൂജാകർമ്മങ്ങൾ ചെയ്യുന്നുണ്ടെങ്കിലും വരൻ പൂർണ്ണമായും ലാപ്‌ടോപ്പിലെ ജോലിയിൽ മുഴുകിയിരിക്കുകയാണ്. വർക്ക് ഫ്രം ഹോം വേറൊരു ലെവലിൽ എത്തുമ്പോൾ എന്നാണ് ഫോട്ടോയ്‌ക്ക് അടിക്കുറിപ്പ് നൽകിയിരിക്കുന്നത്.

ഫോട്ടോ വൈറലായതോടെ പ്രതികരണവുമായി നിരവധി പേരാണ് എത്തിയിരിക്കുന്നത്. കുറച്ചാളുകൾ ഇതിനെ തമാശയായി കണ്ടപ്പോൾ, മറ്റ് ചിലർ ചിത്രത്തെ വിമർശിക്കുകയാണ് ഉണ്ടായത്. ജീവിത ശൈലിയെ തന്നെ മാറ്റിമറിയ്‌ക്കുന്ന ജോലി ഭാരം യുവ തലമുറയെ മാനസിക സമ്മർദ്ദത്തിലാക്കുന്നു എന്നും ആളുകൾ പ്രതികരിക്കുന്നുണ്ട്.