ദോഹ: ഖത്തർ ലോകകപ്പിലെ ഗ്രൂപ്പ് ഡി മത്സരത്തിൽ ഡെന്മാർക്കിനെ ഏകപക്ഷീയമായ ഒരു ഗോളിന് പരാജയപ്പെടുത്തി ഓസ്ട്രേലിയ നോക്കൗട്ടിൽ കടന്നു. ഇതോടെ, ഫ്രാൻസിനെ അട്ടിമറിച്ചുവെങ്കിലും ടുണീഷ്യ ലോകകപ്പിൽ നിന്നും പുറത്തായി. അറുപതാം മിനിറ്റിൽ മാത്യു ലെക്കിയാണ് ഓസ്ട്രേലിയയുടെ വിജയ ഗോൾ നേടിയത്.
2006ന് ശേഷം ഓസ്ട്രേലിയ ആദ്യമായാണ് ലോകകപ്പിന്റെ നോക്കൗട്ട് ഘട്ടത്തിൽ കടക്കുന്നത്. മികച്ച പോരാട്ടം കാഴ്ചവെച്ചായിരുന്നു ഡെന്മാർക്ക് ഒടുവിൽ ഓസീസിന് മുന്നിൽ കീഴടങ്ങിയത്. മത്സരത്തിന്റെ ആദ്യ പാദത്തിൽ ബോൾ പൊസഷനിലും ആക്രമണങ്ങളിലും ഡാനിഷ് പട മുന്നിട്ട് നിന്നുവെങ്കിലും ഗോൾ മാത്രം അകന്നു നിന്നു.
എന്നാൽ, ഓസീസ് ഗോൾ പിറന്നതോടെ ഡെന്മാർക്കിന് ദിശാബോധം നഷ്ടമായി. തുടർന്ന് സമനിലക്കായി കിണഞ്ഞു പരിശ്രമിച്ചുവെങ്കിലും ഓസ്ട്രേലിയൻ പ്രതിരോധം ഭേദിക്കാൻ അവർക്ക് സാധിച്ചില്ല. മറുവശത്ത് ടുണീഷ്യയോട് അപ്രതീക്ഷിത തോൽവി വഴങ്ങിയെങ്കിലും ഫ്രാൻസ് നേരത്തേ തന്നെ നോക്കൗട്ട് ബർത്ത് ഉറപ്പാക്കിയിരുന്നു.
Comments