ന്യൂഡൽഹി : ആഗോള നന്മ ഉൾക്കൊണ്ടുള്ള അജണ്ടയെ അടിസ്ഥാനമാക്കി പ്രവർത്തിക്കുമെന്ന് പ്രധാനമന്ത്രി നരേന്ദ്ര മോദി. ജി 20 പ്രസിഡന്റ് സ്ഥാനം ഇന്ത്യ ഇന്ന് ഏറ്റെടുക്കുന്നതിന് പിന്നാലെയാണ് ഇക്കാര്യം പ്രധാനമന്ത്രി ട്വിറ്ററിൽ കുറിച്ചത്. നവംബറിൽ ബാലിയിൽ ചേർന്ന് ജി 20 ഉച്ചകോടിയിലാണ് അടുത്ത ഗ്രൂപ്പ് പ്രസിഡന്റ് സ്ഥാനത്തേക്ക് ഇന്ത്യയെ തിരഞ്ഞെടുത്തത്.
ഭീകരത, കാലാവസ്ഥാ വ്യതിയാനം, മഹാമാരികൾ തുടങ്ങിയ വെല്ലുവിളികളെ നമുക്ക് ഒരുമിച്ച് നേരിടാം. ഒരു ഭൂമി ,ഒരു കുടുംബം, ഒരു ഭാവി, എന്ന പ്രമേയത്തിൽ നിന്ന് പ്രചോദനം ഉൾക്കൊണ്ട് ഏകത്വം കൂടുതൽ പ്രോത്സാഹിപ്പിക്കുന്നതിനായി ജി-20 പ്രവർത്തിക്കും . ഇന്ത്യയുടെ നേതൃത്വത്തിലാവും ഈ പ്രവർത്തനങ്ങൾ നടക്കുകയെന്നും അദ്ദേഹം കുറിച്ചു. ഭീകരതയ്ക്കെതിരെ ഒന്നിച്ച് പ്രവർത്തിക്കാം എന്ന കുറിപ്പിനൊപ്പം റഷ്യ, സിംഗപ്പൂർ, നെതർലാൻറ്, സൗദി അറേബ്യ തുടങ്ങിയ രാജ്യങ്ങളെയും അദ്ദേഹം ടാഗ് ചെയ്തിട്ടുണ്ട്.
പ്രസിഡൻറ് സ്ഥാനം ഇന്ത്യ ഏറ്റെടുത്തത് മനുഷ്യരാശിക്ക് മൊത്തത്തിൽ പ്രയോജനം ചെയ്യുന്നതിനായാണ്. ഇനിയും മുന്നോട്ട് പോകേണ്ടതുണ്ട്. നമ്മുടെ ചിന്താഗതിയെ ഉത്തേജിപ്പിക്കുന്നതിനുമുള്ള ഏറ്റവും നല്ല സമയമാണിത്. മറ്റ് വിഷയങ്ങൾക്കൊപ്പം ഭക്ഷണം, വളങ്ങൾ, മെഡിക്കൽ ഉൽപന്നങ്ങൾ എന്നിവയുടെ ആഗോള വിതരണത്തെ അരാഷ്ട്രീയവൽക്കരിക്കാനും പ്രവർത്തിക്കാൻ കഴിയുമെന്ന് ഇന്ത്യ പ്രതീക്ഷിക്കുന്നതായും പ്രധാനമന്ത്രി കുറിച്ചു.
Comments