മുടി കൊഴിച്ചിൽ പലരേയും അലട്ടുന്ന പ്രശ്നമാണ്. അതിനൊപ്പം ശിരോചർമ്മം കൂടി വരണ്ടാൽ പറയേണ്ടതില്ല. തണുപ്പ് കാലത്ത് ശിരോചർമ്മം വരണ്ടതാകാനുള്ള സാദ്ധ്യത കൂടുതലാണ്. ഇത് തലമുടികളിൽ താരൻ വർദ്ധിക്കാനും കാരണമാകും. ശിരോചർമ്മം വരണ്ടു കഴിഞ്ഞാൽ ചൊറിച്ചിലും സ്വാഭാവികമാണ്. ഇത് മാറാൻ പല പരീക്ഷണങ്ങളും നമ്മൾ നടത്തുന്നു. ചിലർ വലിയ വില കൊടുത്ത് ക്രീമുകൾ വാങ്ങി പരീക്ഷിക്കാറുണ്ട്. എന്നാൽ മുടികളെ ബാധിക്കുന്ന ഈ പ്രശ്നങ്ങൾക്ക് നമ്മുടെ വീടുകളിൽ തന്നെ പരിഹാരമുണ്ട്. ഈ ശൈത്യകാലത്ത് മുടിയും ശിരോചർമ്മവും വരളുന്നതിന് പരിഹാരം കാണാൻ ചില ഫലപ്രദമായ മാർഗങ്ങൾ നോക്കാം.
1. കറിവേപ്പില എണ്ണ
മുടിയെ പോഷിപ്പിക്കാൻ വളരെ നല്ലതാണ് കറിവേപ്പില എണ്ണ. ഇത് ശിരോചർമ്മത്തിലുണ്ടാകുന്ന രോഗങ്ങൾക്ക് അത്യുത്തമമാണ്. വിറ്റാമിൻ സി,
വിറ്റാമിൻ ഇ, വിറ്റാമിൻ എ, ഫോളിക് ആസിഡ് തുടങ്ങിയ ആന്റിഓക്സിഡന്റുകളാൽ നിറഞ്ഞതാണ് കറിവേപ്പില. ആഴ്ചയിൽ 1-2 തവണ കറിവേപ്പില എണ്ണ ഉപയോഗിച്ച് തല നല്ല പോലെ മസാജ് ചെയ്യുക.
2. വെളിച്ചെണ്ണ
മുടിയിൽ സാധാരണയായി നാം വെളിച്ചെണ്ണ ഉപയോഗിക്കാറുണ്ട്. ശിരോചർമ്മത്തിൽ ജലാംശം നിലനിർത്താനും ആന്റിഫംഗൽ, അൻ്റി ബാക്ടീരിയൽ ഗുണങ്ങൾ ഉള്ളതുകൊണ്ട് അണുബാധയ്ക്കുള്ള സാധ്യത കുറയ്ക്കാനും വെള്ളിച്ചെണ്ണയ്ക്ക് കഴിയും. വെള്ളിച്ചെണ്ണ തേയ്ക്കുമ്പോൾ നല്ലപോലെ ശിരോചർമ്മത്തിൽ പിടിക്കുന്ന പോലെ തേയ്ക്കുക
3. വാഴപ്പഴം
ശിരോചർമ്മത്തിൽ ജലാംശം നൽകാനും താരൻ അകറ്റാനും നല്ലതാണ് വാഴപ്പഴം. വാഴപ്പഴം അരച്ച ശേഷം അതിലേയ്ക്ക് കുറച്ച് വെളിച്ചെണ്ണയോ ഒലിവ് ഓയിലോ ഒഴിക്കുക. നന്നായി കുഴച്ച ശേഷം തലയിൽ നല്ലപോലെ മസാജ് ചെയ്യുക. പത്ത് പതിനഞ്ച് മിനിറ്റ് വച്ച ശേഷമേ കഴുകി കളയാവൂ.
4. കറ്റാർ വാഴ
വരണ്ട ശിരോചർമ്മത്തിന് സഹായിക്കുന്ന നിരവധി ഗുണങ്ങൾ കറ്റാർ വാഴയിലുണ്ട്. ശിരോചർമ്മത്തിൽ ഉണ്ടാകുന്ന വീക്കത്തിന് നല്ല പരിഹാരമാണ് കറ്റാർ വാഴ. തല കഴുകുന്നതിന് തൊട്ടുമുമ്പ്, കറ്റാർ വാഴ മിശ്രിതം തലയിൽ 10-15 മിനിറ്റ് നേരം പുരട്ടുക.
5. തൈരും മുട്ടയും
മുട്ടയിലെ കൊഴുപ്പും പ്രോട്ടീനും ശിരോചർമ്മത്തിലുണ്ടാകുന്ന ചെറിയ ഫംഗൽ പ്രശ്നങ്ങളെ അകറ്റും. ചർമ്മത്തെ മിനുസമാക്കാൻ തൈര് നല്ലതാണ്. ഒരു ചെറിയ പാത്രത്തിലേയ്ക്ക് മുട്ട പൊട്ടിച്ച് ഒഴിക്കുക. അതിലേയ്ക്ക് അര കപ്പ് തൈര് യോജിപ്പിക്കുക. മുടി കഴുകുന്നതിനുമുമ്പ് 10 മിനിറ്റ് തലയിൽ ഇത് പുരട്ടുക.
Comments