തങ്ങളുടെ പുതിയ ഗ്രാൻഡ് വിറ്റാര, എർട്ടിഗ, XL6, സിയാസ് തുടങ്ങിയ മോഡലുകൾ തിരിച്ചു വിളിച്ച് മാരുതി സുസുക്കി. 2022 നവംബർ 2 മുതൽ 28 വരെ നിർമ്മിച്ച 9,125 കാറുകളാണ് കമ്പനി തിരിച്ചു വിളിച്ചിരിക്കുന്നത്. മുൻ സീറ്റുകളിലെ സീറ്റ് ബെൽറ്റുകൾ ഘടിപ്പിച്ചതിൽ ഉണ്ടായ പ്രശ്നങ്ങളാണ് ഇതിന് കാരണം. സീറ്റ് ബെൽറ്റുകൾ വേർപ്പെട്ടു പോകാൻ സാധ്യത കൂടുതലാണ് എന്ന് കണ്ടെത്തിയതിനെ തുടർന്നാണ് വാഹനങ്ങൾ തിരിച്ചു വിളിക്കുന്നത്. മാരുതി സുസുക്കിയുടെ അംഗീകൃത വർക്ക്ഷോപ്പുകളിൽ വാഹനം പരിശോധിച്ച ശേഷം സൗജന്യമായി തന്നെ സീറ്റ് ബെൽറ്റ് മാറി നൽകുമെന്ന് കമ്പനി അറിയിച്ചു.
മാരുതി സുസുക്കി ഈ വർഷം കാറുകൾ തിരിച്ചുവിളിക്കുന്നത് ഇതാദ്യമല്ല. ഒക്ടോബറിൽ, പിൻ ബ്രേക്കിലുണ്ടായ പ്രശ്നങ്ങൾ പരിഹരിക്കാൻ ഓഗസ്റ്റ് 3-നും സെപ്റ്റംബർ 1-നും ഇടയിൽ നിർമ്മിച്ച മാരുതി സുസുക്കി വാഗൺ ആർ, സെലേറിയോ, ഇഗ്നിസ് എന്നീ മോഡലുകളുടെ 9,925 യൂണിറ്റുകൾ കമ്പനി തിരിച്ചുവിളിച്ചിരുന്നു. വീൽ റിമ്മിന്റെ വലിപ്പത്തിലുണ്ടായ അപാകത പരിഹരിക്കാൻ ഏപ്രിലിൽ 19,731 ഇക്കോ എംപിവികളും മാരുതി സുസുക്കി തിരിച്ചുവിളിച്ചിരുന്നു.
അതേസമയം, ഇന്ത്യൻ വിപണിയിൽ മാരുതി സുസുക്കി ഇപ്പോൾ എസ്യുവി നിരയിലാണ് ശ്രദ്ധ കേന്ദ്രീകരിക്കുന്നത്. ഈ വർഷം ആദ്യം, കമ്പനി പുതിയ ബ്രെസ്സ കോംപാക്ട് എസ്യുവിയും ഗ്രാൻഡ് വിറ്റാര മിഡ്സൈസ് എസ്യുവിയും രാജ്യത്ത് അവതരിപ്പിച്ചു. ഒരു പുതിയ ബലേനോ ക്രോസും ഏറെ പ്രതീക്ഷയോടെ കാത്തിക്കുന്ന അഞ്ച് ഡോറുള്ള ജിംനി എസ്യുവിയും അടുത്ത വർഷം വിൽപ്പനയ്ക്കെത്തും. ജനുവരിയിൽ നടക്കുന്ന ഓട്ടോ എക്സ്പോ 2023-ൽ ആഗോളതലത്തിൽ ജിംനി എസ്യുവി അരങ്ങേറ്റം കുറിക്കും.
