മലപ്പുറം: കരിപ്പൂരിൽ വീണ്ടും സ്വർണ വേട്ട. ശരീരത്തിൽ ഒളിപ്പിച്ച് കടത്താൻ ശ്രമിച്ച ഒരു കിലോയിലധികം സ്വർണം പിടികൂടി. സംഭവത്തിൽ ഒരാൾ കസ്റ്റംസിന്റെ പിടിയിലായിട്ടുണ്ട്.
വയനാട് നടവയൽ സ്വദേശി അബ്ദുൾ മജീദ് ആണ് പിടിയിലായത്. സ്വർണം മിശ്രിതമാക്കി ക്യാപ്സൂൾ രൂപത്തിലാക്കിയായിരുന്നു മജീദ് കടത്താൻ ശ്രമിച്ചത്. വിമാനത്താവളത്തിലെ സുരക്ഷാ പരിശോധനയ്ക്കിടെയാണ് ഇയാൾ പിടിയിലായത്. പരിശോധനയ്ക്കിടെ സംശയം തോന്നിയ ഉദ്യോഗസ്ഥർ ഇയാളെ വിശദമായി പരിശോധിക്കുകയായിരുന്നു. തുടർന്നാണ് വയറിനുള്ളിൽ സ്വർണം ഉള്ളതായി കണ്ടത്.
1.011 കിലോ സ്വർണമാണ് ക്യാപ്സൂൾ രൂപത്തിലാക്കി കടത്താൻ ശ്രമിച്ചത്. ഇത്തരത്തിൽ നാല് ക്യാപ്സൂളുകൾ ഇയാളിൽ നിന്നും പിടിച്ചെടുത്തു. ഈ സ്വർണത്തിന് വിപണിയിൽ 54 ലക്ഷം രൂപ വിലവരുമെന്ന് അധികൃതർ അറിയിച്ചു. ദുബായിൽ നിന്നുമാണ് മജീദ് കരിപ്പൂരിൽ എത്തിയത്.
കഴിഞ്ഞ ദിവസവും കരിപ്പൂരിൽ നിന്നും ഒരു കിലോ സ്വർണം പിടിച്ചെടുത്തിരുന്നു. സംഭവത്തിൽ മഞ്ചേരി സ്വദേശിയാണ് പിടിയിലായത്.
