ന്യൂഡൽഹി: ടിക് ടോക്കിന്റെ കാലം അവസാനിച്ചതോടെ ഇൻസ്റ്റഗ്രാം റീൽസിനായി എന്തും ചെയ്യുന്ന സ്ഥിതിയിലാണ് സൈബർ സെലിബ്രിറ്റികൾ. ഡൽഹി മെട്രോയിൽ ബാത് ടവൽ ഉടുത്ത് യാത്ര ചെയ്യുന്ന ഒരു യുവാവിന്റെ വീഡിയോയാണ് ഇപ്പോൾ ഇൻസ്റ്റഗ്രാമിൽ വൈറൽ ആയിരിക്കുന്നത്. തിരക്കേറിയ സമയത്തായിരുന്നു യുവാവിന്റെ യാത്ര.
ബാത് ടവൽ ഉടുത്ത് വെളള ബനിയനും ധരിച്ചാണ് യുവാവ് മെട്രോയിൽ കയറിയത്. സ്ത്രീകൾ ഉൾപ്പെടെയുളള യാത്രക്കാർ ഇരിക്കവേ അവർക്കിടയിലൂടെ യുവാവ് അങ്ങോട്ടും ഇങ്ങോട്ടും ട്രെയിനിനുളളിൽ നടക്കുന്നത് കാണാം. ഇടയ്ക്ക് മുടിയൊക്കെ നേരെയാക്കി കൈകൊണ്ട് ഒതുക്കി വെയ്ക്കുകയും ചെയ്യുന്നുണ്ട്.
ടാങ്കിലെ വെളളം തീർന്നു, കുളിയൊക്കെ ഇനി ഓഫീസിൽ ചെന്നിട്ടാകാം എന്ന ക്യാപ്ഷനോടെയാണ് ഒരു ഇൻസ്റ്റഗ്രാം അക്കൗണ്ടിൽ നിന്ന് വീഡിയോ പുറത്തുവന്നത്. 162,000 ത്തിലധികം ലൈക്കുകളും 1200 ലധികം കമന്റുകളുമാണ് വീഡിയോയ്ക്ക് ലഭിച്ചിട്ടുളളത്. അതേസമയം യുവാവ് എങ്ങനെയാണ് ബാത് ടവൽ മാത്രം ഉടുത്ത് മെട്രോയ്ക്കുളളിൽ കടന്നതെന്ന് വ്യക്തമല്ല. യുവാവിന്റെ പ്രവൃത്തികൾ കണ്ട് പെൺകുട്ടികൾ അടക്കമുളളവർ മുഖം പൊത്തി ചിരിക്കുന്നത് വീഡിയോയിൽ കാണാം.
മുൻപ് ടിക് ടോക്കിലായിരുന്നു ഇത്തരം വീഡിയോകൾ കൂടുതലും പ്രത്യക്ഷപ്പെട്ടിരുന്നത്. ടിക് ടോക്കിന് നിരോധനം ഏർപ്പെടുത്തിയതോടെയാണ് ടിക് ടോക്ക് സെലിബ്രിറ്റികൾ കൂട്ടത്തോടെ ഇൻസ്റ്റഗ്രാം റീൽസിലേക്ക് ചേക്കേറിയത്.
Comments