ലണ്ടൻ: ആദ്യമായി ചിക്കൻ ടിക്ക മസാല ഉണ്ടാക്കിയ ഷെഫ് അലി അഹമ്മദ് അസ്ലം അന്തരിച്ചു.77 വയസ്സായിരുന്നു. അദ്ദേഹം കണ്ടുപിടിച്ച ചിക്കൻ ടിക്ക മസാല ബ്രിട്ടന്റെ എക്കാലത്തെയും പ്രിയപ്പെട്ട കറികളിൽ ഒന്നാണ്.
അലി അഹമ്മദിന്റെ ഉടമസ്ഥതയിലുള്ള ശിഷ് മഹൽ റെസ്റ്റോറന്റ് ഔദ്യോഗിക ട്വിറ്റർ അക്കൗണ്ട് വഴിയാണ് മരണ വിവരം അറിയിച്ചത്. ദു:ഖാചരണത്തിന്റെ ഭാഗമായി രണ്ട് ദിവസം റെസ്റ്റോറന്റ് അടച്ചിടുമെന്നും വ്യക്തമാക്കി. അടുത്ത ചൊവ്വാഴ്ചയാകും അദ്ദേഹത്തിന്റെ സംസ്കാര ചടങ്ങുകൾ നടക്കുക.
അലിയുടെ ഹോട്ടലിൽ എത്തിയ ഒരു ഉപഭോക്താവ് പറഞ്ഞ പരാതിയിൽ നിന്നാണ് സ്വാദിഷ്ഠമായ ചിക്കൻ ടിക്ക മസാലയുടെ ഉത്ഭവം. ഒരിക്കൽ അദ്ദേഹത്തിന്റെ ഹോട്ടലിൽ എത്തിയ ആൾ ഗ്രേവി ഇല്ലാത്തതിനാൽ ഭക്ഷണം കഴിക്കുക പ്രയാസമാണെന്ന് പറഞ്ഞു. ഇതേ തുടർന്ന് പരാതിക്കാരന് വേണ്ടി അലി ചിക്കൻ ടിക്ക മസാല ഉണ്ടാക്കുകയായിരുന്നു. ഇത് അയാൾക്ക് ഇഷ്ടമാകുകയും ചെയ്തു. ഇതോടെ ചിക്കൻ ടിക്ക മസാല ഹോട്ടലിലെ പ്രധാന വിഭവമായും പിന്നീട് ലോകപ്രശസ്ത വിഭവമായും മാറുകയായിരുന്നു.
പാകിസ്താനിലാണ് അലി അഹമ്മദിന്റെ ജനനം. അലി ചെറുതായിരിക്കുമ്പോൾ തന്നെ കുടുംബം ഗ്ലാസ്ഗോവിലേക്ക് കുടിയേറുകയായിരുന്നു. ചെറുപ്പം മുതൽ തന്നെ പാചകത്തിൽ തത്പരനായിരുന്നു അലി.
