കരിപ്പൂരിൽ വീണ്ടും സ്വർണ വേട്ട; എട്ട് ലക്ഷം രൂപയുടെ സ്വർണവുമായി യുവതി പിടിയിൽ; തട്ടാനെത്തിയ സംഘവും കസ്റ്റഡിയിൽ

മലപ്പുറം: കരിപ്പൂർ വിമാനത്താവളം വഴി വീണ്ടും സ്വർണം കടത്താൻ ശ്രമം. സംഭവത്തിൽ യുവതിയുൾപ്പെടെ മൂന്ന് പേരെ പോലീസ് അറസ്റ്റ് ചെയ്തു. സുൽത്താൻ ബത്തേരി സ്വദേശി ഡീന (30), നല്ലളം സ്വദേശി മുഹമ്മദ് സഹദ് (24), വാണിയംകര സ്വദേശി മുഹമ്മദ് ജംനാസ് (36) എന്നിവരാണ് അറസ്റ്റിലായത്. ഇവരുടെ പക്കൽ നിന്നും എട്ട് ലക്ഷം രൂപ വിലവരുന്ന സ്വർണവും പിടികൂടി.

വിദേശത്ത് നിന്നും ഡീനയായിരുന്നു സ്വർണവുമായി എത്തിയത്. ഇവരുടെ പക്കൽ നിന്നും ഈ സ്വർണം തട്ടുകയായിരുന്നു സഹദിന്റെയും, ജംനാസിന്റെയും പദ്ധതി. ഡീനയുടെ കൂട്ടാളികളാണ് ഇവർ. കസ്റ്റംസ് പരിശോധനയ്‌ക്ക് ശേഷം വിമാനത്താവളത്തിന് പുറത്തെത്തിയ ഡീന സംഘത്തിനൊപ്പം കാറിൽ കയറി. ഇതിനിടെ രഹസ്യവിവരത്തിന്റെ അടിസ്ഥാനത്തിൽ എത്തിയ പോലീസ് പിടികൂടുകയായിരുന്നു. ചോദ്യം ചെയ്യലിൽ സ്വർണം കടത്തിയ കാര്യം ഡീന സമ്മതിച്ചില്ല. എന്നാൽ പിന്നീട് സ്വർണമുണ്ടെന്ന് സംഘം സമ്മതിക്കുകയായിരുന്നു.

വയനാട് സ്വദേശിയായ സുബൈറിന് വേണ്ടിയാണ് ഡീന സ്വർണം കൊണ്ടുവന്നത്. ഇതിന് മുൻപും പലതവണ ഡീന സ്വർണം കടത്തിയിട്ടുണ്ട്. ഡീന എത്തിക്കുന്ന സ്വർണം കൂട്ടാളികൾ തട്ടിക്കൊണ്ട് പോയി വീതിക്കുന്നതാണ് ഇവരുടെ രീതി.

146 ഗ്രാം സ്വർണമാണ് ഇവരുടെ പക്കൽ നിന്നും കണ്ടെടുത്തത്. ഇവരെ കൂടുതൽ ചോദ്യം ചെയ്തുവരികയാണ്.