കൊൽക്കത്ത: തൃണമൂൽ കോൺഗ്രസ് പ്രവർത്തകന് സ്വന്തം പാർട്ടി നേതാക്കളിൽ നിന്ന് ക്രൂര മർദ്ദനം. കൊൽക്കത്തയിലെ ഗാരിയയിലാണ് സംഭവം. തൃണമൂലിന്റെ സജീവ പ്രവർത്തകനായ സുഖ്‌ദേവ് പുരോകൈത്താണ് മർദ്ദനത്തിനിരയായത്.
പാർട്ടിയുടെ ജയ് ഹിന്ദ് വാഹിനിയെന്ന സംഘടനയുടെ മുൻ അദ്ധ്യക്ഷനായിരുന്നു സുഖ്‌ദേവ്. രജ്പൂർ-സൊനാർപൂർ മുനിസിപ്പാലിറ്റികളിലാണ് പ്രവർത്തിച്ചിരുന്നത്. തിങ്കളാഴ്ച രാത്രി തന്റെ കടയടച്ച് വീട്ടിലേക്ക് വരികയായിരുന്ന സുഖ്‌ദേവിനെ പാർട്ടി അംഗങ്ങൾ തന്നെ കൂട്ടമായെത്തി മർദ്ദിച്ചു. ഇരുമ്പുവടി കൊണ്ടാണ് അടിച്ചത്. പാർട്ടിയിലെ ആഭ്യന്തര തർക്കമാണ് മർദ്ദനത്തിൽ കലാശിച്ചതെന്നാണ് വിവരം. അടികൊണ്ട് അവശനായ സുഖ്‌ദേവിനെ നാട്ടുകാരെത്തി ആശുപത്രിയിൽ പ്രവേശിപ്പിക്കുകയായിരുന്നു.
ആരോഗ്യനില അതീവ ഗുരുതരമാണെന്ന് ഡോക്ടർമാർ അറിയിച്ചു. സംഭവത്തിൽ തൃണമൂൽ കോൺഗ്രസ് പ്രവർത്തകനായ സമരേഷ് സാഹയ്‌ക്കെതിരെ പരാതി നൽകുകയും പോലീസ് കേസെടുക്കുകയും ചെയ്തിട്ടുണ്ട്. അന്വേഷണം തുടരുകയാണെന്ന് കൊൽക്കത്ത പോലീസ് അറിയിച്ചു.
Comments