കൊല്ലം: മയ്യനാട് ഒന്നര വയസ്സുകാരന് നേരെ തെരുവ് നായയുടെ ആക്രമണം. മയ്യനാട് സ്വദേശികളായ രാജേഷ്- ആതിര ദമ്പതികളുടെ മകൻ അർണവിനെയാണ് തെരുവ് നായ്ക്കൾ ക്രൂരമായി ആക്രമിച്ചത്. ഗുരുതരമായി പരിക്കേറ്റ കുട്ടിയെ ജില്ലാ ആശുപത്രിയിൽ പ്രവേശിപ്പിച്ചു.
വെള്ളിയാഴ്ച ഉച്ചയോടെ വീടിന്റെ മുറ്റത്തുവച്ചായിരുന്നു ആക്രമണം ഉണ്ടായത്. മുറ്റത്ത് കളിച്ചുകൊണ്ടിരുന്ന കുട്ടിയ്ക്ക് മുത്തശ്ശി ഭക്ഷണം നൽകികൊണ്ടിരിക്കുകയായിരുന്നു. ഇതിനിടെ പ്ലേറ്റ് അടുക്കളയിൽ വയ്ക്കാനായി മുത്തശ്ശി വീടിനകത്തേക്ക് പോയി. ഈ സമയം പാഞ്ഞെത്തിയ നായ്ക്കൾ കുട്ടിയെ ആക്രമിക്കുകയായിരുന്നു.
20 ഓളം തെരുവ് നായ്ക്കൾ ചേർന്നാണ് കുട്ടിയെ ആക്രമിച്ചത് എന്ന് മുത്തശ്ശി പറഞ്ഞു. മരക്കഷ്ണം ഉപയോഗിച്ച് നായ്ക്കളെ അടിച്ചോടിച്ച് കുട്ടിയെ രക്ഷിച്ചതും മുത്തശ്ശി തന്നെയാണ്.
ആക്രമണത്തിൽ കുട്ടിയുടെ തലയ്ക്കുൾപ്പെടെ സാരമായ പരിക്കുണ്ട്. പേവിഷബാധയ്ക്കുള്ള വാക്സിൻ കുട്ടിയ്ക്ക് നൽകിയിട്ടുണ്ട്. നിരീക്ഷണത്തിൽ കഴിയുന്ന കുട്ടിയെ ആരോഗ്യ നിലയുടെ അടിസ്ഥാനത്തിൽ തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റും.
Comments