ചിന്തകളെ പൂർണമായും വിശ്വസിക്കരുത്! അബദ്ധ ചിന്തകൾ കുഴിയിൽ ചാടിച്ചേക്കും

എപ്പോഴും ചിന്തിച്ചതിന് ശേഷം കാര്യങ്ങൾ ചെയ്യണമെന്നാണ് മുതിർന്നവർ ഉപദേശിക്കാറുള്ളത്. ചിന്തിക്കാതെ എടുത്തുചാടിയുള്ള പെരുമാറ്റം പലപ്പോഴും കുഴിയിൽ ചാടിച്ചേക്കാമെന്നതാണ് ഈ ഉപദേശത്തിന് കാരണം. വലിയ തീരുമാനങ്ങൾ എടുക്കുമ്പോൾ അതിന് മുമ്പ് നല്ല പോലെ ചിന്തിക്കണമെന്ന് അനുഭവസമ്പത്തുള്ളവർ പറയാറുണ്ട്. വലിയ പ്രബന്ധങ്ങൾ തയ്യാറാക്കുമ്പോൾ മുതൽ കരിയറിന് വേണ്ടി പഠിക്കേണ്ട കോഴ്‌സ് തിരഞ്ഞെടുക്കുമ്പോൾ വരെ ആഴത്തിൽ ചിന്തിക്കേണ്ടത് അത്യാവശ്യമാണ്. കാരണം നല്ലപോലെ ചിന്തിക്കാതെ പറയുന്നതും ചെയ്യുന്നതും എഴുതുന്നതുമായ കാര്യങ്ങൾ പിൽക്കാലത്ത് നമ്മെ വേട്ടയാടിയേക്കാം..

എന്നാൽ അമിതമായ ചിന്തകളും നമ്മെ പ്രശ്‌നത്തിലാക്കും. ചിന്തകളെ നിയന്ത്രിക്കാൻ നമുക്ക് കഴിഞ്ഞിരിക്കണം. ഒരേ കാര്യത്തെക്കുറിച്ച് തലങ്ങും വിലങ്ങും ചിന്തിക്കുന്നതിൽ തെറ്റില്ല. പക്ഷെ, ഒരേ കാര്യത്തെക്കുറിച്ച് ദിവസങ്ങളോളം ചിന്തിച്ചാൽ ചിലപ്പോൾ ചിന്തിക്കുന്നതിന്റെ ഗുണം പോലും നഷ്ടപ്പെട്ടേക്കാം. കാര്യക്ഷമമല്ലാത്ത ചിന്തകൾ നേർവഴിയിൽ നിന്ന് മാറ്റി നടത്തിയേക്കും. അനാവശ്യ കാര്യങ്ങൾ, അനാവശ്യ നേരത്ത് പറയാനും ചെയ്യാനും അമിത ചിന്തകൾ വഴിവെയ്‌ക്കും. ഇത്തരം ചിന്തകൾ കാര്യങ്ങളെ കൂടുതൽ സങ്കീർണമാക്കുകയും ആശയക്കുഴപ്പം വർധിപ്പിക്കുകയും ചെയ്യും. അതിനാൽ ആവശ്യത്തിന് മാത്രം ചിന്തിക്കുക, അതേസമയം ചിന്തിക്കാതെ കണ്ണുമടച്ച് കാര്യങ്ങൾ അവതരിപ്പിച്ച് കുഴിയിൽ ചാടുകയുമരുത്.