ന്യൂഡൽഹി: 2023ലെ കേന്ദ്ര ബജറ്റിനെ പ്രശംസിച്ച് പ്രധാനമന്ത്രി നരേന്ദ്ര മോദി. ഈ ബജറ്റ് വികസിത ഇന്ത്യ കെട്ടിപ്പടുക്കുന്നതിന് ശക്തമായ അടിത്തറയിടുമെന്ന് അദ്ദേഹം വ്യക്തമാക്കി. എല്ലാ മേഖലയെയും ഒരുപോലെ പരിഗണിച്ച ബജറ്റാണ് അവതരിപ്പിക്കപ്പെട്ടതെന്ന് അദ്ദേഹം ചൂണ്ടിക്കാട്ടി
കേന്ദ്ര ബജറ്റ് നിരാലംബർക്ക് മുൻഗണന നൽകുന്നതാണെന്നും അഭിലാഷമുള്ള സമൂഹത്തിന്റെയും കർഷകരുടെയും ഇടത്തരക്കാരുടെയും സ്വപ്നങ്ങൾ സാക്ഷാത്കരിക്കുന്ന ബജറ്റാണെന്നും പ്രധാനമന്ത്രി പറഞ്ഞു.
ഗ്രാമങ്ങളിലും നഗരങ്ങളിലും സ്ത്രീകളുടെ ജീവിതം എളുപ്പമാക്കാൻ സർക്കാർ നിരവധി പദ്ധതികൾ സ്വീകരിച്ചിട്ടുണ്ട്. വനിതാ സ്വയം സഹായ സംഘങ്ങൾ അവരെ കൂടുതൽ മെച്ചപ്പെടുത്തും. വീടുകളിൽ സ്ത്രീകളെ ശാക്തീകരിക്കാൻ പ്രത്യേക സമ്പാദ്യ പദ്ധതി ആരംഭിക്കുന്നുവെന്നും പ്രധാനമന്ത്രി പറഞ്ഞു. ഡിജിറ്റൽ പണമിടപാട് കാർഷിക രംഗത്തും കൊണ്ടുവരുമെന്നും അതിനുള്ള പദ്ധതി ബജറ്റിലുണ്ടെന്നും മോദി വ്യക്തമാക്കി.
രാജ്യത്തെ പരമ്പരാഗത കരകൗശല തൊഴിലാളികൾക്കും കരകൗശല വിദഗ്ധർക്കും ആദ്യമായി പ്രത്യേക പാക്കേജ് കൊണ്ടുവന്നു എന്നതും ഈ ബജറ്റിന്റെ പ്രത്യേകതയാണ്. മാത്രമല്ല ഇടത്തരക്കാരുടെ ശാക്തീകരണത്തിനും ജീവിതനിലവാരം മെച്ചപ്പെടുത്താനും നിരവധി പദ്ധതികൾ ബജറ്റിൽ കൊണ്ടുവന്നിട്ടുണ്ട്. നികുതി കുറയ്ക്കുകയും അതിനനുസരിച്ച് ഇളവുകൾ നൽകുകയും ചെയ്തിട്ടുണ്ടെന്നും പ്രധാനമന്ത്രി കൂട്ടിചേർത്തു.
Comments