തിരുവനന്തപുരം: മുൻ മുഖ്യമന്ത്രി ഉമ്മൻചാണ്ടിയെ തിരുവനന്തപുരത്തെ നിംസ് മെഡിസിറ്റിയിലെത്തി സന്ദർശിച്ച് ആരോഗ്യമന്ത്രി വീണാ ജോർജ്. മുഖ്യമന്ത്രിയുടെ നിർദ്ദേശത്തെ തുടർന്നാണ് പ്രത്യേക സന്ദർശനം. എംഎൽഎമാരായ ആൻസലൻ, സി.കെ ഹരീന്ദ്രൻ എന്നിവർക്കൊപ്പമാണ് മന്ത്രി എത്തിയത്.
ഉമ്മൻചാണ്ടിയേയും മക്കളേയും നേരിട്ട് കണ്ട് സംസാരിച്ചതായി സന്ദർശനത്തിന് ശേഷം ആരോഗ്യമന്ത്രി മാദ്ധ്യമങ്ങളോട് പറഞ്ഞു. ഉമ്മൻ ചാണ്ടിയുടെ ആരോഗ്യനില തൃപ്തികരമാണെന്നും മരുന്നുകളോട് പ്രതികരിക്കുന്നുണ്ടെന്നും ഡോ. മഞ്ജു എസ് തമ്പി പറഞ്ഞു. ശ്വാസകോശ സംബന്ധമായ പ്രശ്നങ്ങളെ തുടർന്നാണ് ആശുപത്രിയിൽ എത്തിച്ചത്. കൊണ്ടുവന്നതിനേക്കാൾ നില മെച്ചപ്പെട്ടെന്നും മെഡിക്കൽ ബോർഡ് രൂപീകരിച്ചിട്ടുണ്ടെന്നും ഡോ. മഞ്ജു അറിയിച്ചു.
ഉമ്മൻചാണ്ടിക്ക് മതിയായ ചികിത്സ നൽകാൻ കുടുംബം തയ്യാറാകുന്നില്ലെന്ന് ചൂണ്ടിക്കാട്ടി അദ്ദേഹത്തിന്റെ സഹോദരൻ മുഖ്യമന്ത്രിയ്ക്ക് പരാതി നൽകിയിരുന്നു. എന്നാൽ ഇത് നിഷേധിച്ച് ഉമ്മൻ ചാണ്ടിയുടെ കുടുംബം രംഗത്തെത്തി. പിതാവിന് മതിയായ ചികിത്സ ലഭിക്കുന്നുണ്ടെന്നും രോഗം ഭേദപ്പെടുന്നുണ്ടെന്നും മകൻ ചാണ്ടി ഉമ്മൻ അറിയിച്ചു.
