ബെംഗളൂരു: വികസ്വര രാജ്യങ്ങളിൽ ഇന്ത്യ അതുല്യമായ സ്ഥാനത്താണെന്ന് കേന്ദ്രമന്ത്രി ഹർദീപ് സിംഗ് പുരി. സമ്പദ്‌വ്യവസ്ഥയും പരിസ്ഥിതിശാസ്ത്രവും പരസ്പരം വൈരുദ്ധ്യത്തിലല്ല, മറിച്ച് അടിസ്ഥാനപരമായി പരസ്പരം ബന്ധപ്പെട്ടിരിക്കുന്നുവെന്ന് ഇന്ത്യ തെളിയിക്കുകയാണെന്ന് അദ്ദേഹം പറഞ്ഞു. ബെംഗളൂരുവിൽ ഇന്ത്യയുടെ ജി20 അദ്ധ്യക്ഷതയ്‌ക്ക് കീഴിൽ നടന്ന പരിസ്ഥിതി, കാലാവസ്ഥാ സുസ്ഥിരത വർക്കിംഗ് ഗ്രൂപ്പിന്റെ ആദ്യ യോഗത്തെ അഭിസംബോധന ചെയ്ത് സംസാരിക്കുകയായിരുന്നു കേന്ദ്രമന്ത്രി .
‘തുർക്കിയുടെ നഷ്ടത്തിൽ ഇന്ത്യ അനുശോചനം രേഖപ്പെടുത്തുന്നുവെന്നും, ആവശ്യമായ ഈ സമയത്ത് സാധ്യമായ എല്ലാ മാനുഷിക സഹായവും മെഡിക്കൽ സഹായവും തുടർന്നും നൽകുമെന്നും അദ്ദേഹം പറഞ്ഞു. ലോകമെമ്പാടുമുള്ള ജനങ്ങളിൽ നിന്നും നേതാക്കളിൽ നിന്നും തുർക്കിക്ക് ലഭിക്കുന്ന പിന്തുണ മനുഷ്യത്വത്തിന്റെ ശക്തമായ ഓർമ്മപ്പെടുത്തലാണെന്നും അദ്ദേഹം അഭിപ്രായപ്പെട്ടു. ജൈവവൈവിധ്യത്തെയും പരിസ്ഥിതിയെയും നശിപ്പിക്കുന്നതിന്റെ അനന്തരഫലങ്ങൾ ജീവിതത്തിന്റെ എല്ലാ മേഖലകളിലും വർധിച്ചുവരുന്ന ചെലവുകളും സങ്കീർണ്ണതകളിലേക്കും നയിക്കുന്നതായി കേന്ദ്രമന്ത്രി പുരി പറഞ്ഞു.
കാലാവസ്ഥാ വ്യതിയാനത്തിന്റെയും ജൈവവൈവിധ്യ നഷ്ടത്തിന്റെയും പരസ്പരബന്ധിതമായ കാര്യങ്ങൾ കൈകാര്യം ചെയ്യുന്നതിന് യോജിച്ചതും കൃത്യതയുള്ളതുമായ ആഗോള ശ്രമം ആവശ്യമാണ്. ഇതിന് ലോക ജിഡിപിയുടെ 85%, ആഗോള വ്യാപാരത്തിന്റെ 75%, ആഗോള ജനസംഖ്യയുടെ മൂന്നിൽ രണ്ട് ഭാഗവും വഹിക്കുന്ന ജി20 രാജ്യങ്ങളുടെ പ്രതിബദ്ധതയുള്ളതും ദീർഘവീക്ഷണമുള്ളതുമായ നേതൃത്വം ആവശ്യമാണ്. പ്രത്യേകിച്ചും, വികസ്വര രാജ്യങ്ങൾ ജി 20 ഉറ്റുനോക്കുന്നു, കാലാവസ്ഥാ പ്രതിസന്ധിയും വികസ്വര രാജ്യങ്ങളുടെ കട പ്രതിസന്ധിയും തടയുന്ന അടിയന്തിര സമവായം ആഗ്രഹിക്കുന്നുവെന്ന് കേന്ദ്രമന്ത്രി ഹർദീപ് സിംഗ് പുരി വ്യക്തമാക്കി
