തിരുവനന്തപുരം: കാവിയ്ക്ക് നിരോധനം ഏർപ്പെടുത്തിയതിനെതിരെ കാവി അണിഞ്ഞ് പ്രതിഷേധം അറിയിച്ച് ഭക്തർ. തിരുവനന്തപുരം വെള്ളായണി ഭദ്രകാളി ദേവി ക്ഷേത്രത്തിലെ കാളിയൂട്ട് മഹോത്സവിനിടയിലാണ് ഭക്തരുടെ പ്രതിഷേധം. ഉത്സവം നടക്കുന്നതിന്റെ പരിസരത്ത് കാവി നിറത്തിലുള്ള കൊടിതോരണങ്ങളും മറ്റ് അലങ്കാരങ്ങളും നിരോധിച്ചിരുന്നു. ഭക്തർ കാവി അണിഞ്ഞ് എത്തരുതെന്ന് കർശന നിർദ്ദേശവുമുണ്ടായിരുന്നു. ഡെപ്യൂട്ടി കളക്ടറുടെ അദ്ധ്യക്ഷതയിൽ ചേർന്ന യോഗത്തിൽ
കാവി തോരണങ്ങളും കൊടികളും ക്ഷേത്രത്തിൽ നിന്ന് ഒഴിവാക്കണമെന്ന് ആവശ്യപ്പെടുകയായിരുന്നു.
രാഷ്ട്രീയ നിഷ്പക്ഷത പുലർത്തുന്ന രീതിയിൽ അലങ്കാരങ്ങൾ ചെയ്യേണ്ടതാണെന്നും കാവി നിറം ഭക്തജനങ്ങൾ ഉപയോഗിക്കാൻ പാടില്ലെന്നുമാണ് അഡീഷണൽ ജില്ലാ മജിസ്ട്രേറ്റ് കൂടിയായ ഡെപ്യൂട്ടി കളക്ടർ നിർദ്ദേശം നൽകിയത്. ഇതിന് പിന്നാലെയാണ് ക്ഷേത്ര കമ്മിറ്റി സെക്രട്ടറി വിഘ്നേശ് എം.എസിനെതിരെ കേസെടുക്കുമെന്നറിയിച്ച് നേമം പോലീസ് നോട്ടീസ് നൽകിയത്. ഡെപ്യൂട്ടി കളക്ടറുടെ നിർദ്ദേശ പ്രകാരമാണ് നേമം പോലീസ് ഇൻസ്പെക്ടർ വിഘ്നേശിനെതിരെ നോട്ടീസ് അയച്ചത്.
During Vellayani Devi temple festival, #KeralaPolice came with a 'ban order': 'saffron' shouldn't be seen near the temple… at that time all decorations were in saffron. Police was adamant, wants to remove all. See the video, how Hindus responded, everyone came in #Saffron. pic.twitter.com/6zerwN1WHh
— KVS HARIDAS (@keveeyes) February 13, 2023
തുടർന്ന് ഭക്തർ പ്രതിഷേധവുമായി രംഗത്തെത്തി. സ്ത്രീ, പുരുഷ ഭേദമില്ലാതെ ഉത്സവത്തിൽ പങ്കെടുത്തവരെല്ലാം കാവി നിറമുള്ള വസ്ത്രങ്ങൾ ധരിച്ചെത്തിയാണ് പ്രതിഷേധം അറിയിച്ചത്. സ്ത്രീകൾ ഓറഞ്ച് നിറത്തിലുള്ള ബ്ലൗസും സാരിയുമാണ് ധരിച്ചത്. പുരുഷൻമാരെല്ലാം തന്നെ കാവി മുണ്ട് ഉടുത്താണ് ഘോഷയാത്രയിൽ പങ്കുച്ചേരാനെത്തിയത്. കുട്ടികളും കൗമാരക്കാരും യുവതികളും കാവി വസ്ത്രത്തിലാണ് എത്തിയത്. ഉത്സവത്തിനായി കാവി തുണിയിൽ നിർമ്മിച്ച പന്തലാണ് ഉപയോഗിച്ചത്. പ്ലാസ്റ്റിക് കൊടിയ്ക്കാണ് നിരോധനം ഏർപ്പെടുത്തിയതെന്നാണ് ഭക്തർ കരുതിയിരുന്നത്. എന്നാൽ പിന്നീടാണ് കാവി നിറത്തിനാണ് നിരോധനം ഏർപ്പെടുത്തിയതെന്ന് മനസിലായതെന്ന് ഭക്തർ വ്യക്തമാക്കി.
Is single colour prohibited in #Kerala, for #Festival decorations in Church, Temple, Mosque, and Gurudwara premises ??#RuleOfLaw #Temple #Church #mosque pic.twitter.com/ukmeB0Muuk
— jacob thomas (@jacobthomas1960) February 12, 2023
തീർത്ഥാടകരെ ആകർഷിക്കുന്ന വെള്ളായണി തടാകത്തിന് സമീപമാണ് വെള്ളായണി ഭദ്രകാളി ദേവി ക്ഷേത്രം സ്ഥിതി ചെയ്യുന്നത്. ദേവസ്വം ബോർഡിന് കീഴിലാണ് ക്ഷേത്രം സ്ഥിതി ചെയ്യുന്നത്. ക്ഷേത്രം നൂറ്റാണ്ടുകളായി പിന്തുടർന്ന് പോരുന്ന ആചാരത്തിൽ സർക്കാർ ഇടപെടുന്നത് അങ്ങേയറ്റം അനാദരവാണെന്ന് ചൂണ്ടിക്കാട്ടി മുൻ ഡിജിപി ജേക്കബ് തോമസ് ഉൾപ്പെടെയുള്ളവർ ട്വിറ്ററിലൂടെ പ്രതിഷേധം അറിയിച്ചിരുന്നു.
