ന്യൂഡല്ഹി: മുന് രാഷ്ട്രപതി പ്രണബ് മുഖര്ജിയുടെ മകളും മുന് കോണ്ഗ്രസ് നേതാവുമായ ശര്മ്മിഷ്ഠ മുഖര്ജി പ്രധാനമന്ത്രി നരേന്ദ്ര മോദിയെ കുറിച്ച് നടത്തിയ പരാമര്ശം ദേശീയ രാഷ്ട്രീയത്തില് പുതിയ ചര്ച്ചകള്ക്ക് വഴിവെച്ചു. സ്വാതന്ത്ര്യാനന്തര ഇന്ത്യ കണ്ട ഏറ്റവും ശക്തരായ പ്രധാനമന്ത്രിമാരില് ഒരാളാണ് നരേന്ദ്ര മോദിയെന്നും, അദ്ദേഹത്തിന്റെ വ്യക്തിപ്രഭാവം നിഷേധിക്കാനാകില്ലെന്നും ശര്മ്മിഷ്ഠ സ്വകാര്യ മാധ്യമത്തില് എഴുതിയ ലേഖനത്തില് വ്യക്തമാക്കി.
2014-ലെ ലോക്സഭാ തിരഞ്ഞെടുപ്പിന് ശേഷം ആദ്യമായി പ്രധാനമന്ത്രിയായി തിരഞ്ഞെടുക്കപ്പെട്ട നരേന്ദ്ര മോദി പാര്ലമെന്റിന്റെ പടികള് വണങ്ങിയ നിമിഷം ദശലക്ഷക്കണക്കിന് ഇന്ത്യക്കാരുടെ ഹൃദയങ്ങളെ സ്പര്ശിച്ച വൈകാരിക മുഹൂര്ത്തമായിരുന്നുവെന്നും അവര് അഭിപ്രായപ്പെട്ടു. 2014-ലെ ലോക്സഭാ തിരഞ്ഞെടുപ്പിന് ശേഷം രാഷ്ട്രപതി ഭവനില് നടന്ന കൂടിക്കാഴ്ചയ്ക്കിടെ പ്രണബ് മുഖര്ജിയും നരേന്ദ്ര മോദിയും തമ്മിലുണ്ടായ സംഭാഷണവും ശര്മ്മിഷ്ഠ ലേഖനത്തില് പങ്കുവെക്കുന്നു.
ആ തിരഞ്ഞെടുപ്പിന്റെ ചരിത്രപ്രാധാന്യം ചൂണ്ടിക്കാട്ടിയ പ്രണബ് മുഖര്ജി, ‘ഇന്ത്യയില് ആദ്യമായി പ്രധാനമന്ത്രി സ്ഥാനാര്ത്ഥിയെ തിരഞ്ഞെടുപ്പിന് മുമ്പ് പ്രഖ്യാപിച്ച്, ആ വ്യക്തിയുടെ പേരില് ജനങ്ങള് നേരിട്ട് വിധിയെഴുതിയ തിരഞ്ഞെടുപ്പായിരുന്നു 2014’ എന്നായിരുന്നു വിലയിരുത്തിയതെന്ന് ശര്മ്മിഷ്ഠ പറയുന്നു. ബിജെപിയുടെ വിജയത്തിന് ശക്തമായ സംഘടനാ സംവിധാനവും വിവിധ സമൂഹങ്ങളിലേക്കുള്ള സ്വാധീനവും തെറ്റുകള് തിരുത്താനുള്ള രാഷ്ട്രീയ പക്വതയും കാരണമായിരുന്നുവെങ്കിലും, നരേന്ദ്ര മോദിയുടെ വ്യക്തിത്വമാണ് പാര്ട്ടിയുടെ ഏറ്റവും വലിയ ശക്തിയെന്ന് ശര്മ്മിഷ്ഠ വിലയിരുത്തുന്നു.
2014-ലെ ഭൂരിപക്ഷ വിജയം ബിജെപിയുടേത് മാത്രമല്ല, മോദിയുടെ പേരില് ലഭിച്ച ജനവിധിയാണെന്നും അവര് ചൂണ്ടിക്കാട്ടുന്നു. 2014-ന് മുമ്പ് ദേശീയ രാഷ്ട്രീയത്തില് പുതുമുഖമായിരുന്ന നരേന്ദ്ര മോദി ഗുജറാത്ത് മുഖ്യമന്ത്രിയായി തന്നെ വ്യക്തമായ രാഷ്ട്രീയ സ്വാധീനം നേടിയിരുന്നുവെന്ന് ശര്മ്മിഷ്ഠ പറയുന്നു. ‘മോദിയുടെ പ്രവര്ത്തനശൈലിയോട് നിങ്ങള്ക്ക് യോജിക്കാതിരിക്കാം. അദ്ദേഹത്തെ നിങ്ങള്ക്ക് ഇഷ്ടപ്പെടാം, വെറുക്കാം. എന്നാല് ‘ബ്രാന്ഡ് മോദി’യെ അവഗണിക്കാന് കഴിയില്ല.
2019-ലും 2024-ലും ലോക്സഭാ തിരഞ്ഞെടുപ്പുകളില് ആ സ്വാധീനം വ്യക്തമായി പ്രകടമായിരുന്നു,’ എന്നാണ് ലേഖനത്തിലെ ശ്രദ്ധേയമായ പരാമര്ശം. രാഷ്ട്രീയപരമായി വ്യത്യസ്ത ചേരികളിലായിരുന്നെങ്കിലും പ്രണബ് മുഖര്ജിയും നരേന്ദ്ര മോദിയും തമ്മില് പരസ്പര ബഹുമാനവും സൗഹൃദപരമായ ബന്ധവും നിലനിന്നിരുന്നുവെന്നും ശര്മ്മിഷ്ഠ ഓര്മ്മിപ്പിക്കുന്നു.
കോണ്ഗ്രസ് പശ്ചാത്തലമുള്ള ഒരു നേതാവില് നിന്നുള്ള ഈ വിലയിരുത്തല് പുറത്തുവന്നതോടെ ദേശീയ രാഷ്ട്രീയത്തില് പുതിയ ചര്ച്ചകള്ക്ക് തുടക്കമായിരിക്കുകയാണ്. പ്രത്യേകിച്ച് ‘ബ്രാന്ഡ് മോദിയെ അവഗണിക്കാനാകില്ല’ എന്ന ശര്മ്മിഷ്ഠ മുഖര്ജിയുടെ പരാമര്ശമാണ് ഇപ്പോള് രാഷ്ട്രീയ വേദികളിലും സാമൂഹിക മാധ്യമങ്ങളിലും വ്യാപകമായി ചര്ച്ച ചെയ്യപ്പെടുന്നത്.
