തിരുവനന്തപുരം: കെപിസിസി പ്രസിഡന്റ് കെ. സുധാകരനെതിരെ പരാതിയുമായി കേന്ദ്ര നേതൃത്വത്തെ സമീപിച്ച് കേരളത്തിൽ നിന്നുള്ള എംപിമാർ. കോഴിക്കോട് എംപി എംപി രാഘവനും വടകര എംപി കെ.മുരളീധരനും ഉൾപ്പെട്ട സംഘമാണ് പാർട്ടി ദേശീയ ജനറൽ സെക്രട്ടറി കെ.സി വേണുഗോപാലിനെ പരാതിയുമായി സമീപിച്ചിരിക്കുന്നത്. കേരളത്തിൽ ഏകപക്ഷീയമായ നടക്കുന്ന പാർട്ടി പുന:സംഘടന നിർത്തിവയ്ക്കണമെന്നും സംഘം നേതൃത്വത്തോട് ആവശ്യപ്പെട്ടെന്നാണ് ലഭിക്കുന്ന വിവരം.
സുധാകരൻ കെപിസിസി പ്രസിഡന്റ് ആയതോടെ കേരളത്തിലെ സംഘടന സംവിധാനം കുത്തഴിഞ്ഞെന്നും എംപിമാർ പരാതിപ്പെട്ടു. കെപിസിസി കെ. മുരളീധരനും എംകെ രാഘവനും കാരണം കാണിക്കൽ നോട്ടീസ് നൽകിയിരുന്നു. ഇതിന് പിന്നാലെയാണ് കെ. സുധാകരനെതിരെ നേതാക്കൾ ദേശീയ ജനറൽ സെക്രട്ടറിയെ സന്ദർശിച്ചിരിക്കുന്നത്. എഐസിസി അംഗങ്ങളായ എംപിമാർക്ക് കാരണം കാണിക്കൽ നോട്ടീസ് നൽകാൻ കെപിസിസിയ്ക്ക് അധികാരമില്ലെന്നും ഇത് കണക്കാക്കാതെയാണ് വിശദീകരണം ആവശ്യപ്പെട്ടിരിക്കുന്നതെന്നും കേരളത്തിൽ നിന്നുള്ള സംഘം ആരോപിക്കുന്നു.
കെ. മുരളീധരനും എംകെ രാഘവനും എ, ഐ ഗ്രൂപ്പുകളുടെ പിന്തുണയുണ്ടെന്നാണ് ലഭിക്കുന്ന വിവരം. പാർട്ടി നേതൃത്വം സ്വീകരിച്ച അച്ചടക്ക നടപടി അനുചിതമായി പോയി എന്നാണ് ഗ്രൂപ്പ് നേതാക്കളുടെ വിലയിരുത്തൽ. ഇരുവർക്കും പറയാനുള്ളത് കേൾക്കാൻ പോലും നേതൃത്വം അവസരം നൽകിയില്ലെന്നും ഗ്രൂപ്പ് നേതാക്കൾ ചൂണ്ടിക്കാണിക്കുന്നു.
Comments